Regionalt samarbeid om bustadforsyning i Bergensregionen (1997)

Husbanken har saman med Bergen kommune, Hordaland fylkeskommune og 13 kommunar i Hordaland laga ein rapport om bustadutviklinga i regionen.

Prosjektet Regionalt samarbeid om bustadforsyning i Bergensregionen (1997) er ei oppfølging av Bergen kommune si ”Boligmelding 1996 – 2000” og ”Fylkesplan for Hordaland 1996 – 1999”.

Mål og motiv
Det overordna målet med prosjektet er å få i gang eit regionalt samarbeid om bustadutviklinga i regionen.

Motivet for prosjektet er knytt til behovet for å tilpasse bustadplanlegginga som følgje av endra kommunikasjonar i regionen, samt å tilfredsstille overordna nasjonale miljømål, mål om utjamning i levekår og satsing på kvalitet i bustader og bustadområde.

Det blir i rapporten lagt til grunn at Bergensregionen er ein integrert arbeids- og bustadmarknad og at bustadpolitikken for kommunane i denne regionen får verknader for heile regionen og ikkje berre for den einskilde kommunen.

Utfordringar
Rapporten oppsummerer fase 1 i prosjektet der det faglege grunnlaget og aktuelle temaområde for eit samarbeid mellom kommunane i Bergensregionen om bustadplanlegging og bustadpolitikk er drøfta. Den viser hovudtrekka i bustadutviklinga i regionen dei siste 20-30 åra og peikar på utfordringar her.

Vegen vidare
Det blir lagt fram eit prioritert forslag til samarbeidsområde på tre nivå:

1. Opprette eit forum der kommunane kan møtast for å dele på data og erfaringar som kan danne grunnlag for eit  samarbeidsprosjekt.
2. Gjennomføre samarbeidsprosjekt for kunnskapsbygging.
3. Utvikle forpliktande felles mål og gjennomføre ein felles bustadpolitikk.

Rapporten konkluderer med at arbeidet må starte opp med eit praktisk regionalt samarbeid gjennom nivå 1 og 2. Eit meir forpliktande samarbeid, nivå 3, må utviklast over tid.

Rapporten: Regionalt samarbeid om bustadforsyning i Bergensregionen.

Kontaktperson: Olav Ohnstad, Husbanken, Regionkontor Bergen.