|
Overleverte flyplassen til Belgia
KABUL: Fram til måndag 1. oktober var den internasjonale flyplassen i Kabul under norsk leiing, men då let oberst Nils Frøisland styringa av Afghanistans viktigaste innfallsport over til belgiske kollegar.
Av kaptein Frank Rosvoll, presse- og informasjonsoffiser for dei norske styrkene i Afghanistan
| | TAKSAM ISAF-SJEF: Her takkar Commander Isaf, general Dan McNeill, oberst Nils Frøisland for jobben Noreg har gjort med å leie drift og utvikling av Kabul International Airport i seks månader. Til venstre står påtroppande sjef for Com Kaia, den belgiske obersten Rudy Geirnaert. |
Noreg har stilt med 50 personar til leiinga av Kabul International Airport (Kaia), mellom anna med sjef, stabssjef , tryggingslag (Force Protection), eksplosivryddarar og einskilde offiserar i stab og støttefunksjonar. Øvste sjef har vore Nils Frøisland, som no tek til som sjef for 134-luftving på Sola.
– Det er med blanda kjensler eg tek farvel med Kaia og alle mine kollegaer, sa Frøisland då han på vegne av Noreg let over leiinga til Belgia.
Den belgiske kontingenten, leia av oberst Rudy Geirnaert, overtok under ein formell seremoni i ein hangar på flyplassen.
Afghansk leiing på sikt
Noreg har hatt hovudansvaret for leiinga av flyplassen i seks månader. No skal belgiarane leie lufthamna eitt år i strekk.
– Eg trur det vil vere med på å styrke kontinuiteten ved drifta, seier den påtroppande flyplassjefen Geirnaert.
Målsetjinga er at afghanarane skal ta over ansvaret for drifta, og lokalt personell er under utdanning og opplæring for å ta over stadig fleire funksjonar. På spørsmål om Frøisland har noko gode råd å gje etterfølgjaren, nikkar han.
– For å få alle til å dra i same retning og leie drifta av flyplassen, må han ha ein god porsjon tålmod og diplomatisk kløkt, seier obersten.
| | PARADE: Det norske bidraget på om lag 50 personar sto oppstilt under den formelle overrekkingsseremonien, vel vitande om at dei snart skal heim til gamlelandet. |
|
|
