Sentralt står utviklinga av dei store genrane: Epikk, dramatikk og lyrikk. Dei blir studerte i eit samanliknande perspektiv over tidsepokar og over språk- og landegrenser. Dette litteraturhistoriske perspektivet blir supplert med ei innføring i dei viktigaste teoriane og metodane i litteraturfaget, slik dei har utvikla seg frå antikken og fram til vår eiga tid.

Vi tar for oss eit utval av hovudverk innafor dei ulike periodane og dei viktigaste sjangrane. Desse verka vert sette i samanheng med litteraturhistoriske tekstar, og med dei allmenne estetiske og kulturelle tendensane i perioden dei høyrer heime i.

Allmenn litteraturvitskap er eit komparativt fag: Ingen litterære verk står aleine, men inngår alltid i ein dialog med andre verk. Difor må dei verte forståtte i høve til desse. Du studerar og dei litterære tekstane i høve til andre kunstartar som biletkunst, film og musikk. Studieretninga gir ei omfattande og fagleg fundert kulturkompetanse som er relevant for andre fagområde innafor humanistiske og estetiske fag.

Det er ingen bestemte forkunnskapskrav til basisdelen av studiet. Men det er ein fordel å ha god lesetrening i fremmendspråk, først og fremst engelsk. Studentane skal lese alle skandinaviske og engelskspråklege pensumverk etter ca. 1500 på originalspråket.