Bargu Davviriikkalaš sámekonvenšuvnnain joatkašuvvá

Stáhtaráđđi Bjarne Håkon Hansen lágidii odne sámediggepresideanttaid ja Suoma, Ruoŧa ja Norgga sámiáššiid ministariid jahkásaš oktasaščoahkkima. Čoahkkimis geigejuvvui Davviriikkalaš giellabálkkášupmi – Gollegiella – nuppes.

Ministarat ja presideanttat leat ovttaoaivilis viidáseappot bargat davviriikkalaš sámekonvenšuvnnain, vuosttažettiin joatkit sisriikkalaš barggu gulaskuddancealkámušaid čuovvolemiin ja vejolaš váikkuhusiskkademiiguin. Guđetguimmiide raporteren, dieđuid juogadeapmi ja oktiiheiveheapmi doaimmahuvvo sámeministariid ja sámediggepresideanttaid davviriikkalaš ovttasbarggu olis sámi áššiid birra.

Ministariid ja presideanttaid mihttomearri lea ahte riikkat leat čielggadan iežaset posišuvnnaid boahtte oktasaščoahkkima rádjái, mii lea 2007 čavčča.

Loga čoahkkinbeavdegirjji dáppe

Davviriikkalaš sámi giellabálkkášupmi – Gollegiella 2006
Dán jagi bálkkášupmi geigejuvvui Suoma beale Čeavetjávrilažžii Jouni Moshnikoffii ja Norgga beale Romsalažžii Harald Gaskii mearkkašahtti barggu ja áŋgirvuođa ovddas nappo nuortalašgiela ja sámegiela ja girjjálašvuođa ovddideami ovddas.