Galgá go sámedikkiide veto-vuoigatvuohta?

Norgga, Suoma ja Ruoŧa sámediggepresideanttaid ja sámeministariid jahkásaš čoahkkimis mannan vahkkus gieđahallui gažaldat Davviriikkaid sámekonvenšuvnna evttohusa viidáset barggu birra. Vaikko oallugat dorjot konvenšuvdnaevttohusa, de leat konvenšuvdnateavsttas maiddái oasit mat soapmásiidda leat váddásat. Dat leat earret eará šiehtadallanvuoigatvuohta ja sámedikkiide vejolaš veto-vuoigatvuohta.

Oktasaščoahkkimis lei ollislaš ovttaoaivilvuohta das ahte Davviriikkaid sámekonvenšuvnna bargu galgá jotkojuvvot, vuosttažettiin sisriikkalaččat buot golmma stáhtas, gulaskuddamiid čuovvoleami ja dárbbašlaš váikkuhusiskkademiid bokte. Ministariid ja sámediggepresideanttaid mihttomearri lea almmotge ahte buot golbma stáhta juo boahtte oktasaščoahkkima rádjái Ruoŧas boahtte čavčča leat čielggadan oainnuideaset ain viidáset bargui.

– Áigumuš ásahit oktasaš riektenjuolggadusaid ovtta álbmogii mii ássa golmma riikkas lea viiddis ja gelddolaš hástalus, man mii váldit hui duođas, lohká stáhtaráđđi Bjarne Håkon Hanssen. Ii leat vuos dahkkon mearrádus veto-vuoigatvuođa dahje Davviriikkalaš sámekonvenšuvnna eará osiid birra. Ráđđehus áigu boahtte oktasaščoahkkima rádjái 2007 čavčča dárkilit gieđahallat konvenšuvdnaevttohusa, lohká stáhtaráđđi Bjarne Håkon Hanssen, ja mii áigut easkka de mearridit iežamet oainnu konvenšuvnna iešguđet osiide.