Sámediggi
Sámediggi lea
iešheanalis álbmotválljen orgána ja lea sámiid ovddasteaddji jietna. Sámedikki
bargui gullet buot áššit mat erenoamážit gusket sámi álbmogii. Sámediggi lea su
stáhtusa ja rolla geažil stáhta sámepolitihka hábmema ovddimus eaktudeaddji ja
sámepolitihkalaš áššiid ráđđeaddi orgána.
Foto: John-Marcus Kuhmunen
Sámedikkis leat 43
áirasa maid sápmelaččat leat sápmelaččaid gaskkas válljen
sámi jienastuslogu vuođul. Riika lea juhkkojuvvon 13 válgabiiren.
Sámediggeválga lágiduvvo juohke njealját jagi seamma beaivvi go
stuorradiggeválga.
Sámediggi
čoahkkana njelljii jahkái. Čoahkkanemiid gaskkas lea
Sámediggeráđis ovddasvástádus Sámedikki doaimmas. Ráđis leat vihtta lahtu
maid Sámedikki áirasat leat válljen Sámedikki áirasiid gaskkas. Sámedikki
doaibma lea guovttebealat: ovddidit politihkalaš álgaga ja evttohit
hálddašandoaimmaid.
Politihkalaš orgánan lea Sámedikkis vuoigatvuohta
mearridit guđe áššiid dat gávnnaha erenoamážit guoskat sámi álbmogii. Dát
mearkkaša maiddái ahte ii oktage orgána sáhte instrueret Sámedikki, ii áššiin,
ii sisdoalus ii ge das gean ovdii áššit galget biddjojuvvot. Sámediggi ii leat
politihkalaš orgánan ráđđehusa vuollásaš orgána, ja danne dat ii leat
ráđđehusa instrukšuvdna- dahje bearráigeahččanválddi
vuollásaš.
Sámedikkis hálddašanorgánan lea ovddasvástádus
máŋgga doarjjaortnegis sámi álbmoga várás, earret eará Sámi kulturfoanddas
ja Sámi ovddidanfoanddas. Sámedikkis lea maiddái sierra doarjjastivra mii
juohká doarjagiid foanddain ja eará doarjjaortnegiin, ja giellastivra mii
meannuda giellaáššiid.
Sámedikki
hálddahusas leat golbma fágaossodaga: Vuoigatvuođa-, ealáhus- ja
birasossodat, Hálddahusossodat ja Bajásšaddan-, giella- ja kulturossodat.
Sámedikki
váldohálddahus lea Kárášjogas. Sámedikkis leat maid kantuvrrat Guovdageainnus,
Unjárggas, Romssas, Divttasvuonas, Háršttás ja Snoasas. Sámedikkis leat sullii
115 bargi.
Sámediggi
Ávjovárgeaidnu 50
9730 Kárášjohka
Telefovdna
78 47 40 00
Telefáksa 78 47 40 90
Interneahtta
www.samediggi.no
e-poasta: samediggi@samediggi.no
