Kommunal- og regionaldepartementet

Dette dokumentet finst i begge målformer.
Skift til bokmålsversjonen ved å trykkje på Bokmål i funksjonslinja over.

Kommunal- og regionaldepartementet (KRD) blei oppretta i 1948.

Til å begynne med hadde departementet ansvaret for spørsmål i samband med arbeidsmarknaden, og med kommunal økonomi og styring. I takt med samfunnsutviklinga har departementet sidan starten fått mange nye arbeidsområde.

I dag har departementet ansvaret for spørsmål som gjeld bustadpolitikk, regional- og distriktspolitikk, lokalforvaltning og gjennomføring av val. Arbeidsoppgåvene til departementet varierer med politiske prioriteringar og aktuelle samfunnsproblem og utfordringar.

Statsråden og tre statssekretærar utgjer den politiske leiinga i Kommunal- og regionaldepartementet. I tillegg har statsråden ein politiske rådgjevar. Departementsråden har den øvste faste embetsstillinga i departementet. Departementsråden avlastar og er rådgivar for statsråden, og samordnar arbeidet i departementet. I departementet er det ei kommunikasjonseining som skal opplyse om rettar, forslag og avgjerder som sorterer under departementet. Kommunal- og regionaldepartementet har om lag 180 tilsette. Kort fortalt fungerer departementet som stab for statsråden.

Departementet har no fire avdelingar: Bustad- og bygningsavdelinga, Regionalpolitisk avdeling, Kommunalavdelinga og Plan- og administrasjonsavdelinga.