| |
Frå 1968 har det vore ei særleg produktavgift i fiskerinæringa. Avgifta gjeld òg for sel- og kvalfangarar. Det er lagt avgift på førstehandsomsetjinga av fisk, kval og sel, og produkt av desse. I 1995 har avgifta vore 3,4 %
Produktavgifta skal dekkje skilnaden mellom høg sats og mellomsats for trygdeavgifta, ettersom næringsdrivande i fiskerinæringa i motsetnad til næringsdrivande utanfor primærnæringane ikkje vert pålagde trygdeavgift med høg sats. Etter framlegget for 1996 er skilnaden mellom høg sats og mellomsats 2,9 % av inntekta. Vidare skal produktavgifta dekkje arbeidsgivaravgift på hyre, rein kollektiv medlemspremie til yrkesskadetrygd (0,2 % av inntekta), dei faktiske utgiftene folketrygda har i samband med frivillig tilleggstrygd for sjukepengar, samt utgifter i samband med stønad til arbeidslause i næringa.
Reglar om utrekning og innbetaling av produktavgift er gitt ved forskrift av 14. mai 1993.
Fiskeridepartementet har i brev av 12. september 1995, jf. utdrag referert i proposisjonen, tilrådd at avgiftssatsen for produktavgift vert fastsett til 3 % i 1996.
Finansdepartementet sluttar seg til dette, og gjer framlegg om at avgiftssatsen for produktavgift vert fastsett til 3 % i 1996.
Komiteen sluttar seg til framlegget frå Regjeringa om å fastsetje produktavgifta til 3 % i 1996.
Komiteen viser til proposisjonen og
til det som står framanfor og rår Stortinget til å gjere slikt
Med heimel i folketrygdlova § 16-1 nr.
2 og 3 vert fastsett:
I 1996 skal følgjande avgifter til folketrygda dekkjast ved ei produktavgift på førstehandsomsetjinga av fisk, kval og sel, og produkt av desse:
| 1. | Trygdeavgift over 7,8 % av pensjonsgivande inntekt frå fiske, kval- og selfangst i inntektsåret. |
| 2. | Arbeidsgivaravgift på hyre til mannskapet på fiske-, kval- og selfangstfarty. |
| 3. | Premie til kollektiv yrkesskadetrygd for fiskarar, kval- og selfangarar. |
| 4. | Avgift til dekkjing av dei utgiftene folketrygda har med stønad til arbeidslause fiskarar, kval- og selfangarar. |
| 5. | Avgift
til dekkjing av dei utgiftene folketrygda har i samband med ordninga med frivillig
tilleggstrygd for sjukepengar til manntalsførte fiskarar, kval- og selfangarar.
|
Produktavgifta skal vere 3 % for 1996.
Avgift på omsetjing av råfisk, råfiskprodukt, kval- og kvalprodukt, vert kravd inn av godkjende salslag, jf. lov av 14. desember 1951 nr. 3 om omsetjing av råfisk § 3 .
Kongen gir reglar om innkreving av
produktavgifta i selfangstnæringa, jf. lov om folketrygd § 16-1 nr. 2 andre
punktum.
| Oslo, i finanskomiteen,
den 29. oktober 1995. |
| Karl Eirik Schjøtt-Pedersen, | Reidar Sandal, | Per-Kristian Foss, |
| leiar. | ordførar. | sekretær. |