| |
Regjeringa gjer i proposisjonen framlegg om ei tilleggsløyving på 170 mill. kroner til hjelp for naudlidande i det tidlegare Jugoslavia. Til no i år har Utanriksdepartementet disponert 80 mill. kroner til føremålet. Det blir vist til at talet på flyktningar, naudlidande og krigsoffer i det tidlegare Jugoslavia no er rekna til over 3,8 millionar. Av desse er om lag 2,3 millionar i Bosnia-Hercegovina heilt avhengige av hjelp utanifrå for å overleva. UNHCR fryktar at det snart vil kome ei matvarekrise, og det er fare for at særs mange menneske risikerer å frysa i hel i vinterkulda.
Det heiter i proposisjonen at det i nært samråd med UNHCR har vore norsk politikk å hjelpa ofra frå konfliktar så nær heimstaden som mogeleg, og at Noreg spelar ei nøkkelrolle i samband med bygging av flykningelandsbyar i Bosnia-Hercegovina. Noreg har også sett i gang helseprogram, gjeve logistikkstøtte, levert mat og medisinar, gjeve støtte til tiltak for kvinner og barn som er ramma av krigen, Den internasjonale Raudekrossen, Verdas Matvareprogram og FN sitt barnefond.
Det heiter vidare i proposisjonen at Noreg på eit møte i Genève i juli 1993, med atterhald om godkjenning i Stortinget, kunngjorde at 250 mill. kroner vil bli gitt i hjelp til flyktningar og krigsoffer frå det tidlegare Jugoslavia.
Proposisjonen inneheld oversikt over løyvinga på kap. 191 Hjelp til flyktningar og menneskerettar, post 75. Det blir m.a. vist til at Utanriksdepartementet alt i 1993 vil overføra støtte også til humanitære tiltak i palestinske område som følge av fredsavtalen mellom PLO og Israel over same kapittel og post. Budsjettsituasjonen gjer det umogeleg å finna rom for ytterlegare hjelp til flyktningar i det tidlegare Jugoslavia under Utanriksdepartementet sitt budsjett for 1993. Det blir difor gjort framlegg om ei tilleggsløyving på 170 mill. kroner gjennom omdisponeringar på statsbudsjettet for 1993. Regjeringa gjer framlegg om at det i 1993 blir løyvd til saman 250 mill. kroner til naudlidande i det tidlegare Jugoslavia. For å dekkja den foreslåtte tilleggsløyvinga på 170 mill. kroner gjer Regjeringa framlegg om å redusera kap. 505 Busetting av flyktningar og integrering av innvandrarar, post 60 Integreringstilskot med 100 mill. kroner, redusera kap. 108 Internasjonal hjelp, post 75 Prosjektsamarbeid med Aust-Europa med 6 mill. kroner, redusera kap. 195 Til dekning av ymse hjelpetiltak, post 70 Tilskot med 24 mill. kroner og redusera kap. 2309 Tilfeldige utgifter, post 11 Varer og tenester med 40 mill. kroner.