| |
Som bakgrunn for forslaget vert det vist til at eit godt tilgjengeleg postnett er ein viktig føresetnad for næringslivet og busetjinga i heile landet. Forslaga frå Postverket om samanslåing av postdistrikt og ei storstilt nedlegging av postkontor skapar stor uvisse om dei framtidige posttenestene i store delar av landet. Det rår i dag stor uro i mange lokalsamfunn. Folk fryktar at det lokale postkontoret skal leggjast ned i den omorganiseringa som det no vert lagt opp til i Postverket.
Det har vore eit viktig politisk mål å oppretthalde eit likeverdig postservicetilbod i alle delar av landet.
Senterpartiet kan ikkje akseptere dei planane som no ligg føre om sentralisering og postkontornedlegging. For å hindre ei slik massiv nedlegging av postkontor, som vil gå ut over servicen både i by- og landkommunar, vil Senterpartiet føreslå at det vert utarbeidd ein nasjonal plan for korleis postkontornettet skal sjå ut i framtida, der det vert trekt opp faste kriterium for postservicen og distribusjonsnettet. Postservicen må planleggjast som ein del av det totale servicetilbodet i kommunane.
Inntil ein slik plan er handsama av Stortinget, må planane om nedlegging av postkontor stansast, der eit fleirtal i kommunestyret går imot nedlegging.