| |
Det vert i dokumentet gjort følgjande framlegg:
Stortinget ber Regjeringa medverke til at drifta ved Røde Kors Haugland Rehabiliteringssenter blir sikra fram til status som opptreningsinstitusjon blir avklart.
Som bakgrunn for forslaget viser forslagsstillarane Astrid Marie Nistad, Sverre J Hoddevik og Kjell Opseth til at Røde Kors Haugland Rehabiliteringssenter (RKHR) vart opna i 1992, og at det er det einaste i helseregion III som er godkjent som opptreningssenter gruppe I. Røde Kors Nordisk United World College (RKNUWC) vart bygt på Røde Kors sin grunn og opna i 1995. Forslagsstillarane peikar på at institusjonane er svært avhengige av kvarandre gjennom felles drift og utvikling, og at Stortinget la stor vekt på dette samarbeidet då anleggs- og driftskapital til RKNUWC vart løyvd i 1993.
Forslagsstillarane uttalar at senteret vart bygt fordi Røde Kors meinte det var rettferdig at Vestlandet (helseregion III ) med 1/5 av folketalet i landet (900 000 menneske) skulle få eit rehabiliteringstilbod på lik linje med dei spesielle institusjonane som Beitostølen, Valnesfjord m.v. Senteret fekk ikkje slik godkjenning den gongen, og måtte nøye seg med såkalla I-status, men eigarane rekna dette som ei mellombels ordning, då det vart sett i gang arbeid frå regjeringshald med utgreiing av rehabiliteringsfaget innan norsk helsevesen.
Det vert understreka at senteret i dag har ein godt kvalifisert fagstab med rådgjeving og samarbeid med sjukehusa i regionen og Sunnaas Sjukehus. Røde Kors Haugland Rehabiliteringssenter arbeider spesielt med rehabilitering av kreftpasientar i kopling med hjarte- og smertetilstander, og har utvikla spesiell kompetanse.
Det blir vist til utsegn frå Norsk forening for fysikalsk medisin og rehabilitering, Det regionale helseutval, region III og Fagrådet for fysikalsk medisin og rehabilitering Region Vest som stør ei oppgradering av Hauglandsenteret.
Det blir vist til at refusjonen frå Rikstrygdeverket til gruppe I-institusjon ikkje er tilstrekkeleg til å finansiera eit tilbod med så høg fagleg standard, og at Røde Kors Haugland Rehabiliteringssenter i dag har eit akkumulert underskot som trugar institusjonen sin eksistens som opptreningsinstitusjon.
Forslagsstillarane meiner at skal Røde Kors Haugland Rehabiliteringssenter sikrast som den einaste institusjonen med slikt tilbod i helseregion III, må staten medverke fram til framtidig status som opptreningsinstitusjon blir fastlagd.