Materialitet og samfunn - bacheloroppgåve

Mål og innhald

Læringsmål

Emnet dreier seg om kva tyding materielle omgjevnader og gjenstandar har i vårt daglegliv. I emnet lærer studentane å sjå det materielle som kulturelle fenomen som kan problematiserast på ulike måtar.

Fagleg innhald

Emnet tematiserer det materielle, både i samfunnsmessige og kulturelle samanhenger. Søkelyset vert retta mot korleis det materielle i form av gjenstandar og landskap dannar praktiske føresetnader og kulturelle mønster. Det gjeld til dømes korleis vi forvaltar og skaper tradisjonar, korleis vi endrar og konstruerer nye omgjevnader og representasjonar av røyndomen. Perspektiva i emnet vert og retta mot korleis den fysiske verda, både i offentlege og private samanhenger, er grunnleggande for forståinga av den innforståtte kvardagen og den meir framande verda vi møter eller oppsøker. Teoretisk vil det bli lagt vekt på kulturelle prosessar og kulturelle perspektiv som løftar fram materielle meiningskategoriar.  

Læringsutbyte/resultat

Kunnskapar

Studenten kan analysera den materielle verda ut frå eit kulturvitskapleg perspektiv i ei sjølvstendig oppgåve. Arbeidet kan fokusere på vår eiga tid og/eller historisk tid.

Ferdigheiter

Studenten har fått trening i å innhenta eit kjeldemateriale, gjera eit avgrensingsarbeid, utvikla presise problemstillingar og å skriva ein lengre sjølvstendig resonnerande tekst.

Generell kompetanse

Studenten kan kommunisera om faglege tema med andre med bakgrunn innan fagområdet.

Undervisningssemester

Vår

Undervisningsspråk

Norsk

Studienivå

Bachelor

Institutt

Institutt for arkeologi, historie, kultur- og religionsvitskap

Krav til studierett

Emnet er ope for studentar med studierett ved UiB.

Krav til forkunnskapar

Ingen

Tilrådde forkunnskapar

Instituttet rår til at ein har teke eksamen i KUVI 101, KUVI 102, samt to sjølvvalde kulturvitskapsemne før ein tek til på KUVI255. Vidare rår ein til at bacheloroppgava vert skriven i 5. eller 6. semester.

Fagleg overlapp

KUVI105

Undervisning og omfang

Undervisninga blir gitt gjennom forelesingar og rettleiing.

Obligatoriske arbeidskrav

Studentane skal i arbeidsprosessen levera bacheloroppgåva i minimum to utkast til fastsette tidspunkt. Det første utkastet skal innehalda ei skisse av temaet, førebels disposisjon og kort utgreiing om relevant litteratur. Dette utkastet er basis for diskusjon mellom rettleiar og student.
Pensumlista skal godkjennast av faglærar og leverast saman med den endelege oppgåva.
Obligatoriske arbeidskrav er gyldige i eitt semester etter det undervisningssemesteret dei vart godkjende.

Vurderingsformer

 Eksamen er ei skriftleg bacheloroppgåve med ein justerande munnleg eksamen. Bacheloroppgåva skal ha eit omfang på 5000 - 6000 ord. Framstillinga skal vera dokumentert med tilvisingar til litteratur og kjelder.

Karakterskala

Det vert nytta gradert karakterskala frå A til F, der F er stryk.

Læremiddelomtale

Pensum er på 1200 - 1500 sider. Studenten leverer saman med bacheloroppgåva inn ei pensumliste der halvparten av litteraturen er henta frå pensumlista på KUVI105 og halvparten er sjølvvald. Lista skal vera godkjend av faglærar.

Undervisningsstad

Bergen

Emneevaluering

Studentane vil med jamne mellomrom bli bedne om å evaluera emnet.

Kontaktinformasjon

Studierettleiar@ahkr.uib.no