Nokre verksemder kjem i dei neste vekene til å få brev med varsel om tilsyn frå Datatilsynet. Bruk av personopplysningar i finanskonsern, innan privat etterforsking og på friskular er blant fokusområda i 2006.

Ikkje alt er bra når det gjeld personvernarbeidet i verksemdene. Då Datatilsynet var på tilsyn i 2005 var det fleire viktige manglar. Leif T. Aanensen, leiar for Datatilsynets tilsyns- og tryggleiksavdeling, trekkjer særleg fram fem: Brot på plikt til internkontroll, på informasjonstryggingsreglane, på sletteplikta, informasjonsplikta og bruk av urimeleg inngripande tiltak.

Personopplysningslova er no blitt fem år gammal. Lova krev systematikk, internkontroll og god informasjon rundt bruken av personopplysningar i verksemdene.

Liten kunnskap om regelverket
- Vi er spente på om resultata etter kvart kan bli noko betre enn dei har vore, seier Leif T. Aanensen. Mange av verksemdene Datatilsynet har vore på tilsyn hos hittil har hatt for liten kunnskap om regelverket.  - I fyrste rekkje ser vi dette gjennom at dei ikkje eingong har ei oversikt over kva personopplysningar dei faktisk behandlar. Dei fleste får merknad om manglande internkontroll, seier Aanensen. - Dette er alvorleg fordi internkontroll er det viktigaste fundamentet for å kunne følgje lovkrava.

- Datatilsynet har fleire gonger peikt på at det ser mykje god vilje hos mange verksemder, men at dette i liten grad er følgt opp med systematiske tiltak. Vi har sett mange eksempel på at dette er nødvendig. Som eit eksempel viste fleire saker frå 2005 at manglande retningslinjer for bruk av arbeidsplassen sitt datautstyr kan gi svært uheldige konsekvensar. Fleire verksemder gjekk svært lange i å granske eigne arbeidstakarar - i fleire tilfelle utan at dei rørte fekk vite om det, seier Aanensen. 

I 2006 skal Datatilsynet gå på tilsyn hos fleire verksemder, blant anna hos aktørar innan finans, privat etterforsking og friskular.

- Datatilsynet ønskjer å auke kunnskapen sin om bruk av personopplysningar i finanskonsern, og korleis bankkonsesjonane faktisk blir tolka, opplyser Aanensen. - Vi kjem spesielt til å sjå på flyten av opplysningar til og frå banken innan konsern, og sletting av opplysningar. Etter å ha fått fleire tips kjem vi også til å sjå på bruken av opplysningar i konsernet sine register for å utføre ei slags ”intern” kredittvurdering av kundar, seier Aanensen. Utveksling av opplysningar innan konsern må følgje same rammer som mellom andre verksemder.

Datatilsynet har også valt å velje ut nokre private etterforskarar for å sjå nærmare på under kva rammevilkår slike verksemder arbeider. - Vi har sett i einskilde tilsyn at nokre etterforskarar driv aktivitetar som ligg tett opp mot politiarbeid, utan at lovforankringa nødvendigvis er avklard, seier Aanensen.
 
Bruk av personopplysningar i dei private friskulane blir også eit tema for Datatilsynet i 2006.  - Vi ønskjer spesielt å sjå nærmare på friskular som er tilknytt trussamfunn, seier Aanensen. Datatilsynet har fått eit inntrykk av at nokre av desse skulane har svært store mengder opplysningar om enkeltpersonar utan at tilsynet kan sjå ei sakleg grunngiving. Datatilsynet har også støtt på saker der friskulane har teke i bruk rustesting av elevane, og ønskjer å sjå om dette er ein utbreidd praksis.