|
Det var mange studentar. Men ikkje mange nok i Filadelfia, totalt skal dei vera omlag 450 stk, men det var såpass mange tomme sete at det var tydeleg at mange ikkje hadde kome. Vi blei møtt av heftige trommer frå Kossa Diomande og Raymond Sereba frå Elfenbeinskysten. Dekan Trine Grønn heldt talen for dagen og introduserte dei andre aktørane slik at dei fekk fortelja om sine arbeidsområde. Studentpresten Valborg Stene var der, Pia Wirum frå studentparlamentet og John Hvidsten frå OAS. "Engasjer dykk", sa dei og la vekt på kor viktig det er å vera aktiv og sosial.  Direktør og studieleiarar blei deretter presenterte saman med kontorsjefar og Veks koordinator. Trine Grønn avslutta med eit fint dikt av Jan Erik Vold. (Ta vare på vennligheten). Og så var det registrering til sju utdanningar, (tannteknikk tek ikkje opp nye studentar i år). Lange køar med spente studentar bortetter veggane og nedetter trappene. Det var ein fin velkomstseremoni, innslag frå Diomande og Sereba løyste opp stemninga og skapte rytme og varme i forsamlinga. Dei som gav informasjon gjorde det kortfatta og greit. Vi ønskjer studentane alt godt i tre år framover, og håper dei lærer å tenkja sjølv, dersom dei ikkje alt kan det då? |