Lindrande behandling, pleie og omsorg 1

Studieinnhald

Prinsippa bak lindrande behandling, pleie og omsorg blir brukt både ved kreftsjukdom og andre alvorlege kroniske sjukdommar. Fagfeltet palliasjon er relativt nytt, og ny kunnskap blir utvikla fortløpande. Studiet legg opp til at du skal få utvikla din eigen erfaringskunnskap, og tileigne deg ny kunnskap på området, slik at din kompetanse  kan bety ein forskjell for pasient og pårørande.

Du lærer

• om korleis det er å leve med alvorleg, uhelbredeleg sjukdom
• å arbeide og argumentere kunnskapsbasert
• sentrale teoriar innan palliasjon, som håp, meining, liding, sorg og eksistensielle behov
• om pårørande sin situasjon
• korleis du skal kommunisere med menneske i krise
• om smerte og symptomlindring ved langt komen kreftsjukdom

Studieplanen er utarbeidd i samarbeid med Kreftforeningen og Kompetansesenter for lindrande behandling.

Studieplan

I studieplanen finn du informasjon om korleis studiet er bygd opp, oversikt over emne, pensum med meir. Les den!

Undervisningsmåtar

Du lærer gjennom forelesingar, gruppearbeid og seminar. Du må rekne med noko sjølvstudium mellom samlingane, mellom anna til arbeidskrav og heimeeksamen.

Som vidareutdanningsstudent har du allereie tillegna deg ein yrkeskompetanse, og vi ønskjer at du skal nytte di eiga erfaring i møte med ny kunnskap som blir formidla. Mange av forelesingane legg derfor opp til dialog og refleksjon mellom student og forelesarar. 

Vi har tre samlingar på til saman 10-12 dagar. Sjå samlingsdatoar.