Kunst og handverk

Kunst og handverk er eit valgfag i 3. og 4. studieår i allmennlærarutdanninga, men kan godt takast som vidareutdanning. Vi har også erfaring med kurs for lærarar og skolar i regionen.

Kunst og handverk er eit estetisk fag, og vi arbeider først og fremst med praktiske utprøvingar i ulike materiale. Kulturarven med kunst og formkultur utgjer ein grunnleggande del av studiet. Sansing, intuisjon og refleksjon er sentrale erkjenningsmåtar både i praktisk handverk og ulike særeigne kunstneriske uttrykk.

Ekskursjonar til Nidarosdomen og dei store musea i sentrum av Trondheim er ein del av studiet. Ulike former for utstilling av studentarbeid er ein del av vurderingsforma.