Doktorgradsstudium ved Høgskolen i Telemark
Det bør etablerast doktorgradsstudium innan gass- og energisystem og innan kulturstudiar ved Høgskolen i Telemark (HiT). Dette foreslår to utval oppnemnde av høgskoleleiinga i dei første delutgreiingane sine. Dette er viktig nybrottsarbeid fordi HiT i dag ikkje har sjølvstendig rett til å tildele doktorgrad og fordi fire doktorgradsstudium er minimumskrav for å få universitetsstatus. Slik status meiner HITs styre at høgskolen bør ha fått innan 2013, anten åleine eller saman med andre.
Rektor og høgskoledirektøren oppnemnde og fastsette mandat for to utval 14. februar i år til å greie ut spørsmål om doktorgradsstudium ved HiT. Det eine utvalet, leia av professor Morten Chr. Melaaen ved Avdeling for teknologiske fag i Porsgrunn og med professor emeritus Rolf Ergon som utvalssekretær, skulle ta for seg området gass- og energisystem.
Det andre utvalet, leia av professor Per Mangset ved Avdeling for allmennvitskaplege fag i Bø og med førsteamanuensis Inger Birkeland som utvalssekretær, skulle sjå nærare på området kulturfag. Utvala skulle levere to delutgreiingar. I den første delutgreiinga, som ligg føre no, skulle utvala foreslå ei fagleg avgrensing av det aktuelle området, vurdere disponeringa av eksisterande ressursar utan nedlegging av anna fagleg verksemd, og vurdere behovet for tilleggsressursar.
Begge utvala har under arbeidet rådført seg med eksterne og interne referansegrupper.
Melaaenutvalet foreslår samrøystes at det blir etablert eit nytt doktorgradsstudium innan gass- og energisystem som tek utgangspunkt i dei fagområda ved Avdeling for teknologiske fag som er bidragsytarar til det doktorgradsstudiet høgskolen no tilbyr i samarbeid med Norges teknisk-naturvitskaplege universitet og nokre britiske universitet.
Desse fagområda utgjer det nødvendige breie grunnlaget for studiet, medan ei ny tverrfagleg overbygging er retta inn mot forskingsbasert innovasjon og nyskaping innan ramma av god energi- og naturforvaltning. Utvalet meiner det nye doktorgradsstudiet vil ha eit nasjonalt særpreg og vere av internasjonal interesse. Det er dessutan lagt vekt på at studiet skal spele ei viktig rolle i den vidare industrielle og samfunnsmessige utviklinga i regionen.
For å få etablert studiet meiner utvalet det vil vere behov for 4 nye professorar i full stilling, 9 nye toarstillingar (20 %), 2,5 årsverk forskingsassistanse i form av stipendiatar, og 3,5 nye tekniske stillingar. I tillegg kjem 6 ekstra stipendiatstillingar, datautstyr for inntil 1 mill. kroner, og årlege driftskostnader (lisensar, bøker, tidsskrift m.v.) på vel 1 mill. kroner.
Mangsetutvalet foreslår samrøystes at det blir etablert eit doktorgradsstudium i kulturstudiar med ei fleirfagleg, tematisk organisering i dei to spissingsområda Kulturpolitikk og kulturformidling og Kulturproduksjon og estetisk praksis.
Det første temaområdet har fokus på den sosiale organiseringa av kultur, på kva samfunnsmessige funksjonar kultur har og på korleis kultur blir formidla. Det andre temaområdet fokuserer på kulturens kreative, handlande og produktive karakter, og særleg på forståinga av kunstens eigenart og på produksjon og tolking av kunstnarlege objekt og verk.
Det er rekna med ei rekruttering til studiet på 5 nye stipendiatar kvart år. Studiet har fagleg basis i eksisterande forskingsmiljø og faglege ressursar ved Avdeling for allmennvitskaplege fag i Bø og ved Avdeling for estetiske fag, folkekultur og lærarutdanning på Notodden og i Rauland.
Utvalet meiner eit doktorgradsstudium på dette området må sjåast som eit ledd i oppbygginga av HiTs rolle i den nasjonale arbeidsdelinga mellom universitet og høgskolar, men òg som ein reiskap for å styrkje høgskolens relasjonar til omverda, og spesielt til regionalt kultur- og næringsliv.
Utvalet meiner det trengst 4 nye årsverk fordelte på delar av 10-15 stillingar til saman for å ivareta undervisning og rettleiing knytt til doktorgradsstudiet. I tillegg kjem fleire nye stipendiatstillingar, 1,5 stilling knytte til biblioteket, 0,5 stilling som forskingskonsulent, meir areal, og årlege driftskostnader til bibliotek- og IT-tenester på nær 1 mill. kroner.
Etter ein intern høyringsrunde vil utgreiingane bli lagde fram til handsaming i styret i møtet 15. desember. Styret vil på det møtet ta stilling til om arbeidet skal førast vidare i neste fase, som førebels er tenkt å skulle vere avslutta til 1. september 2006. Med eit positivt vedtak i styret, vil utvala til då ha utarbeidd utkast til søknad til Nasjonalt organ om kvalitet i utdanninga (NOKUT) om akkreditering av doktorgradsstudium på dei to områda. Dersom NOKUTs styre finn at studia kan akkrediterast, må høgskolen i neste omgang søkje Utdannings- og forskingsdepartementet om etableringsgodkjenning av studia.
Høgskoledirektør Nils Røttingen
