Mange selskap og organisasjonar vender seg direkte til folk for å marknadsføre tenester og produkt, mellom anna ved hjelp av adresselister. Mykje av reklamen du får, er sendt ut på grunnlag av slike lister. Du kan komme med på slike lister utan at du sjølv ynskjer det. Dersom du bed om det, kan du bli sletta frå slike lister. Tidlegare måtte du i så fall kontakte kvart enkelt selskap for å få namnet og adressa di fjerna frå lista.

Reservasjonsregisteret gjer det mykje lettare for deg å reservere deg. I staden for å ta kontakt med kvart enkelt selskap, er det no nok at du tar kontakt med oss. I Reservasjonsregisteret kan du reservere deg mot at namnet og adressa di blir nytta til direkte reklame sendt i posten, gjennom telefon og mobiltelefon. Reservasjonen blir registrert i eit sentralt register. Alle som sender ut reklame retta mot deg som kunde, pliktar å oppdatere sine lister mot Reservasjonsregisteret seinast tre månader før bruk.

Når du har registrert din reservasjon mot direkte adressert reklame i Reservasjonsregisteret, skal du ikkje få reklame som er adressert særskilt til deg etter at fristen på tre månader er ute.

Likevel vil du framleis kunne få reklame for produkt og tenester frå dei du er fast kunde hos. Reservasjonen gjeld dessutan berre adressert reklame. Vil du reservere deg mot uadressert reklame, må du kontakte Posten.

Berre privatpersonar kan reservere seg. Næringsdrivande verksemder og andre juridiske personar kan ikkje reservere seg gjennom Reservasjonsregisteret.

Selskap og organisasjonar som nyttar adresselister til direkte reklame, har sjølv ansvar for å få oppdatert adresselistene mot Reservasjonsregisteret. Dersom du får send reklame som du meiner er i strid med reservasjonen din, bør du kontakte dei som har sendt deg reklamen og krevje namnet ditt sletta frå adresse- og telefonlistene. Datatilsynet har laga ein brevmal som du kan bruke. Fører ikkje det fram, kan du vende deg til Datatilsynet.

Sjå eventuelt forskrifta til Reservasjonsregisteret.