Kap. II - Støtte til søkjar som har rett til vidaregåande opplæring
1 KVEN SOM ER OMFATTA AV KAPITLET
1.1
Dette kapitlet gjeld for søkjar som søkjer støtte til vidaregåande opplæring som han/ho har rett til etter opplæringslova § 3-1.
Dette kapitlet gjeld og for søkjar som tek eit år i vidaregåande opplæring for å få generell studiekompetanse, og for søkjar som tek vidaregåande opplæring i utlandet, med rett til støtte etter kap. V.
1.2
Det gjeld ulike reglar for tildeling av støtte til søkjar over og under 19 år som har rett til vidaregåande opplæring. Søkjar under 19 år blir behandla etter del I i kapitlet, og søkjar over 19 år blir behandla etter del II i kapitlet.
DEL I - STØTTE TIL SØKJAR UNDER 19 ÅR SOM HAR RETT TIL VIDAREGÅANDE OPPLÆRING
2 SØKJAR UNDER 19 ÅR
2.1
Kapittel II del I gjeld for søkjarar som er fødde i 1984 eller seinare. Det gjeld også for søkjarar fødde i 1983 som har fått utsett skolestarten, eller har teke eit år i grunnskolen om igjen etter sakkunnig vurdering. Vidare gjeld det søkjarar fødde i 1983 som går eit fjerde år i vidaregåande opplæring, når det er dokumentert at søkjaren har måtta gå om igjen eit år på grunn av sjukdom eller etter sakkunnig vurdering. Søkjarar fødde i 1982 eller 1983 som har utvida rett til vidaregåande opplæring på grunn av særleg opplæringsbehov, kan også få støtte etter dette kapitlet.
2.2
Søkjar under 19 år som er gift, har vore gift, eller har barn å forsørgje og bur saman med barnet, får søknaden behandla etter kap. II del II.
N
Søkjarar som gifter seg eller får barn, får søknaden behandla etter kap. II del II for heile det aktuelle semesteret.
3 GRUNNBELØP
3.1
I utrekninga av støttebeløpet inngår det eit grunnbeløp. For 2002-03 er grunnbeløpet kr 3 550 per månad.
4 TILLEGG VED UTREKNING AV STØTTE
4.1
Søkjarar som ikkje bur hos foreldra, får butillegg når reisetida mellom foreldreheimen og skolen er tre timar eller meir per dag, eller avstanden er 40 km eller meir.
N
Søkjaren skal kunne følgje den undervisninga som er fastsett i den ordinære timeplanen. Reisetida blir rekna etter dei ruteavgangane som er aktuelle. Det blir teke omsyn til gangtid og ventetid undervegs. Gangtida blir rekna med 15 minutt per km. Ventetida før og etter ordinær skoletid blir rekna med i reisetida.
N
Sjølv om foreldreheimen til søkjaren ligg mindre enn tre timars reisetid tur-retur/40 km reiseavstand ein veg frå lærestaden, kan det bli gitt butillegg når:
- søkjaren må bu på skoleinternatet. Elevar som på grunn av plassmangel blir plasserte på hybel utanfor internatet, kan også få butillegg
- rutetidene er slik at søkjaren ville ha komme for seint til den reglementerte undervisninga dersom han skulle ha budd heime
- søkjaren må bu borte på grunn av særleg vanskeleg kommunikasjon (gjeld også om det er vanskar berre delar av året)
N
Søkjarar som bur borte berre nokre dagar i veka, og som elles fyller vilkåra for butillegg, kan få butillegg etter kor mange døgn dei bur borte. Eks.: To netter borte gir 2/5 butillegg. Minstestipendet kan bli gitt etter den same brøken.
N
Avstanden blir rekna på grunnlag av opplysningane i dei aktuelle rutetabellane.
4.1.1
Butillegg kan også bli gitt når søkjaren må bu utanfor foreldreheimen på grunn av andre særlege forhold.
N
Særlege forhold kan vere:
- sosiale forhold, f.eks. alvorlege konfliktar i heimen som gjer at søkjaren vil bli hindra i å gjennomføre utdanninga
- at foreldreheimen er så trang at søkjaren må dele soverom med eit anna familiemedlem (samla buareal må også takast med i vurderinga)
- at søkjaren bur i den tidlegare foreldreheimen etter at foreldra har flytta til eit anna distrikt i landet eller til utlandet
- at foreldra til søkjaren er skilde og forholda er slik at søkjaren ikkje kan bu hos nokon av dei
- at søkjaren må bu borte på grunn av sjukdom eller funksjonshemming
- at søkjaren er foreldrelaus
- at søkjaren og ein av foreldra bur saman medan dei begge er i utdanning og av den grunn mellombels bur borte frå den ordinære bustaden
N
Dersom skolen og foreldra av omsyn til undervisninga finn det urimeleg at søkjaren skal bu heime, kan Lånekassen godta det.
N
Dersom søkjaren vender seg direkte til Lånekassen for å få butillegg etter unntaksregelen, må dei særlege forholda vere dokumenterte av sosialkontor, lege eller andre.
4.2
For 2002-03 er butillegget kr 2 235 per månad.
4.3
Tillegg for bøker og materiell blir gitt med kr 280 per månad. Sjå også punkt 7.1.2.
N
Søkjar som tek ei ordinær fulltidsutdanning, og som samtidig tek ei anna utdanning i tillegg som gir rett til støtte, får ikkje dobbel dekning av bøker og materiell eller skolepengar.
4.3.1
Tillegg for bøker og materiell blir ikkje gitt til søkjar som får desse utgiftene betalte gjennom folketrygda eller gjennom andre ordningar.
4.3.2
Det blir til vanleg ikkje gitt tillegg for bøker og materiell når det blir gitt støtte til forseinking.
5 FRÅDRAG VED UTREKNING AV STØTTE
5.1
Støttebeløpet blir redusert ved behovsprøving etter den samla inntekta og formuen til forsørgjarane (foreldre/steforeldre). Når frådraget skal reknast ut, bruker Lånekassen allmenn inntekt og nettoformue ved skattelikninga for 2000. Inntekt/formue i utlandet eller på Svalbard, som ikkje er med i likninga, skal også reknast med.
N
For søkjar under aldersgrensa blir likningsopplysningane for foreldra brukte, dersom det kan skaffast frå det aktuelle året. Dersom foreldra ikkje har vore likna til Noreg, eller det ikkje kan skaffast dokumentasjon på annan måte, blir den noverande inntekta lagd til grunn.
5.1.1
Blir det dokumentert at brutto inntekt/formue til forsørgjarane i skoleåret er lågare enn i inntektsåret 2000, kan Lånekassen ta omsyn til det. Det blir ikkje teke omsyn til ein vanskeleg økonomisk situasjon på grunn av auka utgifter.
N
Opplysningane må vere stadfesta av f.eks. arbeidsgivar, trygdekontor, sosialkontor e.l.
N
Denne framgangsmåten blir brukt for å komme fram til allmenn inntekt, som utgjer
grunnlaget for å rekne ut frådraget:
- Likningsopplysningane for 2000 må vere tilgjengelege/liggje føre.
- Når det ligg føre opplysningar om endra inntekt for forsørgjarane, må det hentast inn dokumentasjon på den eventuelle brutto inntekta/trygda/pensjonen/bidraget osv. per månad i skoleåret. Pensjon eller bidrag og minstebidrag til søkjaren og eventuelle sysken under aldersskiljet må også takast med. Dersom endringa skjer etter 31. desember, får søkjaren ny utrekning og ettertildeling berre for vårsemesteret.
- Samla bruttobeløp per år blir redusert med eit frådrag på 22 prosent - maksimum
kr 41 000. Det skal gjerast for kvar av forsørgjarane dersom begge har redusert inntekt.
- Etter dette frådraget blir restbeløpet redusert med 15 prosent.
Ligg det føre opplysningar om endra inntekt for berre ein av forsørgjarane, skal det nye beløpet brukast saman med likningsopplysningane (for likningsåret) for den av forsørgjarane som ikkje har endra inntekt.
- Dersom det beløpet ein kjem fram til, er større enn den samla skattbare inntekta til forsørgjarane i 2000, skal likningsopplysningane for 2000 brukast.
5.1.2
Er foreldra skilde eller separerte, bruker Lånekassen likningstala til den av foreldra som søkjaren bur hos eller budde hos sist.
N
Er ekteskapet til foreldra oppløyst i 2000 eller seinare, kan ein bruke likningsopplysningane for dette året for den av forsørgjarane som har overteke hovudansvaret for søkjaren. Ligg det føre opplysningar om endringar i inntekta til den forsørgjaren som har hovudansvaret for søkjaren, skal den same regelen brukast som i nærmare reglar til punkt 5.1.1. Blir beløpet høgare enn forsørgjarinntekta på likningsattesten for 2000, skal likningsopplysningane brukast. Ved delt omsorg skal halvparten av den samla inntekta og formuen til begge foreldra leggjast til grunn.
N
Dersom søkjaren ikkje budde heime, eller flytta ut då separasjonen/skilsmissa fann stad, og søkjaren ikkje har budd saman med nokon av foreldra etterpå, skal inntekta og formuen på likningsattesten til foreldra delast i to. Det beløpet som då kjem fram, skal nyttast i behandlinga, om det ikkje er opplyst noko anna om forsørginga.
N
Når buforholda er mellombels eller uklare, men det er godtgjort at berre den eine av foreldra har hovudansvaret for søkjaren, kan inntekta og formuen til denne eine leggjast til grunn ved behandlinga.
5.1.3
Når søkjaren bur utanfor foreldreheimen, kan Lånekassen sjå heilt eller delvis bort frå inntekta og formuen til stemor/stefar når det er lagt fram opplysningar som gjer det rimeleg.
N
Dersom det ligg føre opplysningar om at ein søkjar som bur utanfor foreldreheimen, ikkje får tilskott frå stemor/stefar, kan ein sjå bort frå stemors/stefars inntekt og formue ved behovsprøvinga.
5.2
Av forsørgjarane sin formue over kr 590 000 blir det rekna 10 prosent som tillegg til inntekta.
5.3
Frådrag etter forsørgjarinntekt og talet på sysken under 19 år. Inntekta blir sett lik allmenn inntekt ved skattelikninga i 2000 med eventuelle tillegg etter punkt 5.2. Inntekta blir runda av ned til næraste heile 1 000 kroner.
(tabell)
5.3.1
Er det fleire sysken under 19 år som er i utdanning med rett til støtte samtidig, blir frådraget for kvart barn sett til 80 prosent av det frådraget som går fram av tabellen.
5.4
Lånekassen kan sjå heilt eller delvis bort frå inntekta/formuen til forsørgjarane når det er dokumentert at søkjaren ikkje kan få tilskott frå dei av særleg tyngjande sosiale grunnar, og det elles er rimeleg. Det blir til vanleg ikkje teke omsyn til endra økonomiske forhold på grunn av husbygging, kjøp av husvære o.l.
N
Lånekassen ser bort frå foreldreinntekta for søkjarar under aldersskiljet når foreldra er i frivillig eller tvungen rettsleg gjeldsordning. Namsretten skal orienterast om behandlingsresultatet.
5.5
Støttebeløpet blir redusert på grunnlag av eiga arbeidsinnekt i søknadsperioden. Dersom inntekta varierer, blir gjennomsnittleg månadsinnekt per semester brukt. Av bruttoinntekt over kr 5 425 per månad går 60 prosent til frådrag. Som arbeidsinntekt blir rekna inntekt av arbeid som ikkje går inn i undervisningsplanen.
N
Når søkjaren har hatt støtte i heile kalenderåret 2000 og det går fram av likningsattesten for det året at søkjaren har hatt ei inntekt over fribeløpet som er høgare enn det søkjaren har oppgitt i søknaden til Lånekassen, kan Lånekassen krevje beløpet tilbakebetalt - jf. kap. I punkt 16.1. Det vil til vanleg skje ved at Lånekassen reduserer støtta for 2002-03.
Sjå elles nærmare reglar til del II punkt 13.1.
5.6
Støttebeløpet blir redusert på grunnlag av arbeidsfri inntekt i søknadsperioden. Av slik inntekt går 60 prosent av bruttobeløpet til frådrag.
Som arbeidsfri inntekt blir rekna mellom anna
- lærlinglønn
- inntekt av fast eigedom
- rente- og aksjeutbytte
- trygd og pensjonsytingar
- verdien av fri kost og losji eller tilskott frå skolen til slike utgifter
- skattepliktig gevinst ved sal av aksjar eller bustad
Om tilskott til opphaldsutgifter frå folketrygda, sjå kap. I punkt 12.
N
Lånekassen ser bort frå stønad som er gitt etter lov om sosial omsorg (sosialhjelp). Om sosialhjelp til flyktningar, sjå nærmare reglar til kap. IV punkt 2.1.
N
Bidrag til søkjaren blir rekna som foreldreinntekt.
N
Lånekassen ser bort frå barnepensjon på inntil kr 4 280 per månad (grunnbeløpet i folketrygda) som søkjaren får når begge foreldra er døde. Pensjon over kr 4 280 per månad blir rekna som arbeidsinntekt. (Det blir då gitt eit fribeløp på kr 5 425 i tillegg.)
N
Barnepensjon som blir gitt når den eine av foreldra er død, blir rekna som foreldreinntekt.
N
Får søkjaren utbetalt livrente, skal det trekkjast for rentedelen av utbetalinga etter dette punktet. Den delen av utbetalinga som er tilbakebetaling av premie, går ikkje til frådrag i støtta.
N
Inntekt av fast eigedom skal reknast ut frå nettoinntekta av næringa (utan frådrag for gjeldsrenter) slik det kjem fram på utskrift av likninga. Sidan dette gjeld inntekta i det året det blir søkt om støtte for, blir eit oppgitt cirka-beløp i søknaden godteke.
5.6.1
Det blir ikkje rekna frådrag for stipend/legat til skolepengar som Lånekassen ikkje dekkjer. For stipend og legat til utdanning frå andre enn arbeidsgivaren blir det elles rekna frådrag på 60 prosent av beløp over kr 1 925 per månad.
N
Stipend som ikkje er øyremerkt til spesielle formål, blir rekna å skulle dekkje skolepengar. Er stipendet større enn skolepengane, blir det gitt eit fribeløp på kr 1 925 per månad før eit eventuelt frådrag blir rekna ut.
N
Det blir ikkje trekt for stipend som skal dekkje ekstrautgifter i samband med idretten for toppidrettsutøvarar.
5.6.2
Kommunal eller statleg bustøtte og støtte frå folketrygda som skal dekkje ekstra utgifter på grunn av sjukdom, skade eller lyte, påverkar ikkje støttebeløpet.
5.7
Har søkjaren ein formue på meir enn kr 198 000 ved skattelikninga for 2000, går to prosent per månad til frådrag (det vil seie 20 prosent når undervisningsåret varer i ti månader). Når skattelikninga for 2001 ligg føre, kan søkjaren be om at formuen for dette året blir lagd til grunn.
6 UTREKNING AV UTDANNINGSSTIPENDET
6.1
Det er ikkje nødvendig å søkje om lån for å få utdanningsstipend.
6.2
Grunnlaget for utrekning av utdanningsstipend per månad (stipendgrunnlaget) er summen av grunnbeløpet i punkt 3, tillegga i punkt 4 og frådraga i punkt 5.
6.3
Det kan ikkje bli gitt utdanningsstipend for dei første kr 2 505 per månad av stipendgrunnlaget. For den delen av stipendgrunnlaget som er større enn kr 2 505 og mindre enn kr 6 630, blir 93 prosent gitt som stipend (månadssatsen). Månadssatsen blir avrunda oppover til næraste heile fem kroner.
6.3.1
For søkjar som kan få butillegg, skal månadssatsen vere minst kr 3 450. Det gjeld ikkje for søkjar som får støtte frå folketrygda, når støtta er meint å dekkje alle nødvendige utgifter til skolegangen.
6.3.2
Det samla stipendbeløpet kjem fram ved at månadssatsen blir multiplisert med talet på månader i den utdanningsperioden det blir søkt om stipend for.
6.4
Lærling som har brutto lønn over kr 11 490 per månad, får ikkje utdanningsstipend.
N
Det blir rekna med gjennomsnittleg brutto lønn per månad i semesteret.
6.5
For flyktning i vidaregåande opplæring gjeld det særlege reglar, sjå kap. IV punkt 1.
7 UTREKNING AV LÅNET
7.1
Tillegg som berre blir gitt som lån:
7.1.1
skolepengar, til vanleg avgrensa til kr 20 860 per undervisningsår. Det blir ikkje gitt støtte til skolepengar i land utanfor Norden, sjå kap. V punkt 6.
7.1.2
nødvendige utgifter til materiell utover satsane i punkt 4.3. Lånet blir gitt etter nærare reglar, og det er ein føresetnad at materiellet er nødvendig, og at utstyret ikkje kan bli dekt over skolebudsjettet.
7.2
Grunnlaget for utrekninga av lånet er summen av grunnbeløpet i punkt 3, tillegga i punkt 4, eventuelle tillegg i punkta 7.1.1 – 7.1.2 og frådraga i punkt 5. Summen må multipliserast med talet på månader i den utdanningsperioden det blir søkt om lån for.
7.3
Maksimalt lån blir differansen mellom det utrekna grunnlaget i punkt 7.2 og det utrekna utdanningsstipendet i punkt 6.
7.4
For andre stipend enn utdanningsstipendet vil det gå fram av forskriftene for kvart stipend om beløpet skal trekkjast frå ved utrekninga av lånet.
8 REISESTIPEND
8.1
I tillegg til støttebeløpet kan det bli gitt reisestipend til tre reiser tur-retur for eit heilt undervisningsår (ti månader) mellom foreldreheimen i Noreg og skolestaden. Stipendet blir gitt som tilskott etter satsane i Lånekassen. Endringar i moderasjonsordningar frå 1. januar 2002 vil ikkje påverke storleiken på reisestipend frå undervisningsåret 2002-03. Det blir gjort eit frådrag på kr 970 per undervisningsår som søkjaren må dekkje sjølv. Søkjar som bur i foreldreheimen, kan ikkje få reisestipend. Det same gjeld søkjar som får støtte til fjernundervisning etter kap. I punkt 4.4. Det gjeld særlege reglar for reisestipend til land utanfor Norden, sjå kap. V punkt 7.
N
Reisestipendet blir rekna per månad. Beløpet per månad blir avrunda oppover til nærmaste heile ti kroner. Ved utrekning av reisestipend blir månadssatsen multiplisert med talet på månader i søknadsperioden.
(Dette gjeld også når søkjaren får støtte til utvida undervisningsår.)
N
Ved reiser til eit anna nordisk land blir eigendelen trekt frå dei totale reisekostnadene.
N
Når det er dokumentert at foreldra er i utdanning og av den grunn har ei mellombels adresse i søknadsperioden, kan reisestipendet bli rekna til den permanente adressa til foreldra.
N
Er foreldra busette i utlandet (har inga adresse i Noreg), kan det ikkje bli gitt reisestipend, heller ikkje til grensestasjon i Noreg (Oslo).
N
Søkjar under 19 år får reisestipendet rekna til den av foreldra vedkommande blir behovsprøvd i forhold til, når foreldra er separerte/skilde. Bur søkjaren ikkje hos foreldra og blir behovsprøvd etter gjennomsnittet av foreldreinntekta (sjå andre N til punkt 5.1.2), blir reisestipendet rekna til den av foreldra søkjaren har oppgitt adressa til.
N
Det blir gitt reisestipend når søkjaren bur mellombels hos ein av foreldra under utdanninga, sjølv om det er hos den andre av foreldra søkjaren normalt bur hos/er behovsprøvd mot.
8.1.1
Det kan ikkje bli gitt reisestipend til søkjar som får dekt reiser gjennom folketrygda eller andre ordningar.
9 MINSTEBELØP
9.1
Det blir ikkje gitt lån under kr 65 eller berre stipend under kr 35 per månad.
DEL II - STØTTE TIL SØKJAR OVER 19 ÅR SOM HAR RETT TIL VIDAREGÅANDE OPPLÆRING
10 SØKJAR OVER 19 ÅR
10.1
Kapittel II del II gjeld søkjar som er fødd i 1983 eller tidlegare. Søkjar fødd i 1983 som har fått utsett skolestart eller har teke om igjen eit år i grunnskolen etter sakkunnig vurdering, kan få støttebeløpet rekna ut etter del I. Det same gjeld for søkjar fødd i 1983 som går eit fjerde år i vidaregåande opplæring, når det er dokumentert at søkjaren har måtta gå eit år om igjen på grunn av sjukdom, eller etter sakkunnig vurdering. Søkjar fødd i 1982 eller 1983 som har utvida rett til vidaregåande opplæring på grunn av særleg opplæringsbehov, kan også få støttebeløpet rekna ut etter del I.
10.2
Også søkjar under 19 år som er gift, har vore gift eller har barn å forsørgje og bur saman med barnet, får søknaden behandla etter kap. II del II. Sambuarar som har felles barn, blir behandla som gifte frå og med det semesteret dei får barn. Sjå kap. I punkt 2.2.
N
Søkjar som gifter seg eller får barn, får søknaden behandla etter del II heile det aktuelle semesteret.
N
Søkjar som har barn og som sjølv mellombels bur borte frå barnet under utdanninga, får også støtta rekna ut etter del II.
11 GRUNNBELØP
11.1
I utrekninga av støttebeløpet inngår det eit grunnbeløp. For 2002-03 er grunnbeløpet kr 4 290 per månad.
12 TILLEGG VED UTREKNING AV STØTTE
12.1
Søkjar som ikkje bur saman med foreldra, kan få butillegg. Søkjar som har barn og bur hos foreldra, kan likevel få butillegg. Det same gjeld gift søkjar utan barn.
Det blir ikkje gitt butillegg til mellom anna:
– søkjar som bur i same bustad som foreldra
– søkjar som har eiga bueining i huset der foreldra bur
– søkjar som bur i bueining som høyrer til huset der foreldra bur
N
Søkjar som har vore gift eller sambuar med felles barn, kan få butillegg sjølv om han bur saman med foreldra.
N
Ugift søkjar som berre har bidragsplikt for barn og ikkje bur saman med barnet, får ikkje butillegg når han bur hos foreldra (ikkje bur i eige husvære).
N
Søkjar kan få butillegg når søkjaren og ein av foreldra bur saman medan dei begge er i utdanning, og av den grunn mellombels bur borte frå den ordinære bustaden.
12.2
For 2002-03 er butillegget kr 2 235 per månad.
12.3
Det kan bli gitt tillegg for bøker og materiell med kr 280 per månad. Sjå også punkt 15.1.2.
12.3.1
Det kan ikkje bli gitt tillegg for bøker og materiell til søkjar som får desse utgiftene betalte gjennom folketrygda eller andre ordningar.
12.3.2
Det blir til vanleg ikkje gitt tillegg for bøker og materiell når det blir gitt støtte til forseinking.
N
Det blir gitt tillegg for bøker og materiell dersom søkjaren skifter til eit anna fag.
N
Søkjaren må vere forseinka med eitt semester (10 vekttal) eller meir før tillegget for bøker og materiell fell bort.
12.4
Gift søkjar kan få forsørgjartillegg for barn fødde i 1987 eller seinare, og for ektefellen. Det kan bli gitt opptil kr 2 580 per månad for ektefelle og eitt barn, opptil kr 1 290 per månad for det andre barnet, og opptil kr 830 per månad for kvart barn fleire enn to.
N
Ved behandlinga av søknad om forsørgjartillegg blir det kravd dokumentasjon på inntekta til ektefellen/sambuaren.
N
Det blir ikkje gitt forsørgjartillegg til berre ektefelle.
N
Utanlandsk statsborgar kan få forsørgjartillegg berre når ektefelle og barn bur i Noreg.
N
Det blir ikkje gitt forsørgjartillegg for fosterbarn som søkjaren har ansvar for.
N
Forsørgjartillegg blir gitt frå same tidspunkt som ved fødselsstipend, det vil seie frå ca tre veker før fødselen.
12.4.1
Forsørgjartillegget blir redusert med 60 prosent av ektefellen si bruttoinntekt over kr 18 110 per månad. Er begge ektefellane i utdanning som det kan bli gitt støtte til, blir det sett bort frå inntekta til ektefellen.
N
Med bruttoinntekt er meint all inntekt ektefellen har, også ytingar frå anna hald osv. Er ektefellen bidragspliktig, skal bidraget trekkjast frå brutto inntekt før forsørgjartillegget blir rekna ut. Mottek ektefellen bidrag, skal bidraget leggjast til inntekta før utrekninga.
N
Dersom inntekta til ektefellen varierer, blir det rekna med gjennomsnittet per semester. Frådraget blir rekna ut frå dette gjennomsnittsbeløpet.
12.4.2
Det kan ikkje bli gitt forsørgjartillegg for ektefelle som er i militær- eller sivilteneste.
12.5
Ektefellar som begge er i utdanning og kan få støtte, kan kvar få forsørgjartillegg på opptil kr 1 290 per månad for kvart av dei to første barna, og opptil kr 830 per månad for kvart barn fleire enn to.
N
Har ektefellen fått avslag på grunn av andre forhold enn økonomisk behovsprøving, kan søkjaren få forsørgjartillegg etter punkt 12.4.
12.6
Einsleg forsørgjar kan få forsørgjartillegg på opptil kr 1 290 per månad for kvart av dei to første barna, og opptil kr 830 per månad for kvart barn fleire enn to.
N
Ved delt omsorg blir det gitt forsørgjartillegg som til einsleg.
12.6.1
Det kan ikkje bli gitt forsørgjartillegg for ektefelle og/eller barn søkjaren er pliktig å betale bidrag for.
13 FRÅDRAG VED UTREKNING AV STØTTE
13.1
Støttebeløpet blir redusert på grunnlag av eiga arbeidsinntekt i søknadsperioden. Dersom inntekta varierer, blir det brukt gjennomsnittleg månadsinntekt per semester. Av bruttoinntekt over kr 5 425 per månad går 60 prosent til frådrag. Som arbeidsinntekt blir rekna inntekt av arbeid som ikkje går inn i undervisningsplanen.
13.1.1
Støttebeløpet kan bli redusert etter nærare reglar når søkjaren har hatt inntekt i tidlegare støtteperiodar som det ikkje var gitt fullstendige opplysningar om. Sjå også kap. I punkt 15.1.
N
Når søkjaren har hatt støtte i heile kalenderåret 2000 og det går fram av likningsopplysningane for dette året at søkjaren har hatt ei inntekt over fribeløpet som er høgare enn det søkjaren har oppgitt i søknaden til Lånekassen, kan Lånekassen krevje beløpet tilbakebetalt - jf. kap. I punkt 16.1. Det vil til vanleg skje ved at Lånekassen reduserer støttebeløpet for 2002-03.
13.2
Støttebeløpet blir redusert på grunnlag av arbeidsfri inntekt i søknadsperioden. Av slik inntekt går 60 prosent av bruttobeløpet til frådrag. Som arbeidsfri inntekt blir rekna mellom anna
- lærlinglønn
- inntekt av fast eigedom
- rente- og aksjeutbytte
- forsørgjartillegg medan ektefellen er i militær-/sivilteneste
- underhaldsbidrag over minstebidraget
- trygde- og pensjonsytingar
- trygde- og pensjonsytingar til søkjaren sine barn under 16 år når beløpet er
større enn minstebidraget
- verdien av fri kost og losji eller tilskott frå skolen til slike utgifter
- skattepliktig gevinst ved sal av aksjar eller bustad
Om tilskott til opphaldsutgifter frå folketrygda, sjå kap. I punkt 12.
N
Det blir sett bort frå stønad gitt etter lov om sosial omsorg (sosialhjelp). Om sosialhjelp til flyktningar, sjå nærmare reglar til kap. IV punkt 2.1.
N
Det blir sett bort frå barnepensjon på inntil kr 4 280 per månad (grunnbeløpet i folketrygda). Pensjon over kr 4 280 per månad blir rekna som arbeidsinntekt. (Det blir då gitt eit fribeløp på kr 5 425 i tillegg.)
N
Det blir sett bort frå nedkomststønad (eingongsutbetaling ved fødsel).
N
Ved utbetaling av livrente blir det trekt for rentedelen av utbetalinga etter dette punktet. Den delen av utbetalinga som er tilbakebetaling av premie, går ikkje til frådrag i støtta.
N
Inntekt ved utleige av fast eigedom skal reknast ut frå nettoinntekta (utan frådrag av gjeldsrenter, men trekt frå utgifter til vedlikehold osv.). Sidan dette gjeld inntekta i det året det blir søkt om støtte for, blir eit oppgitt cirka-beløp i søknaden godteke.
N
Det blir sett bort frå den delen av attføringsstønaden som ein bidragspliktig søkjar får til å dekkje bidraget, dersom dette går fram av stønadsbrevet.
13.2.1
Det blir ikkje rekna frådrag for NORDPLUS-stipend, LEONARDO-stipend eller stipend/legat til skolepengar som Lånekassen ikkje dekkjer. For stipend og legat til utdanning frå andre enn arbeidsgivar blir det rekna eit frådrag på 60 prosent av beløp over kr 1 925 per månad. Sjå likevel punkt 16.1.1.
N
Stipend som ikkje er øyremerkt til spesielle føremål, blir rekna å skulle dekkje skolepengar. Er stipendet større enn skolepengane, blir det gitt eit fribeløp på kr 1 925 per månad før eit eventuelt frådrag blir rekna ut.
N
Det blir ikkje trekt for stipend som skal dekkje ekstrautgifter i samband med idretten
for toppidrettsutøvarar.
13.2.2
Barnetrygd, kontantstøtte, kommunal eller statleg bustøtte og støtte frå folketrygda som skal dekkje ekstra utgifter på grunn av sjukdom, skade eller lyte, påverkar ikkje støttebeløpet.
13.3
Av formuen til einsleg søkjar over kr 198 000 ved skattelikninga for 2000 går to prosent per månad til frådrag (det vil seie 20 prosent når undervisningsåret varer i ti månader). Når skattelikninga for 2001 ligg føre, kan søkjaren be om at formuen for det året blir lagd til grunn.
13.4
Av formuen til gift søkjar (formuen til søkjaren + ektefellen) over kr 380 000 ved skattelikninga for 2000 går ein prosent per månad til frådrag (det vil seie ti prosent når undervisningsåret varer i ti månader). Lånekassen kan likevel sjå bort frå formue som ektefellen til søkjaren har i særeige. Sjå likevel punkt 13.3, siste setning.
N
At ektefellen har hatt formuen med seg inn i ekteskapet, gir i seg sjølv ikkje grunnlag for å sjå bort frå formuen eller gi høgare fribeløp. Særeige må dokumenterast ved kopi av tinglyst ektepakt.
N
Sambuarar kan ikkje ha særeige, og støtta må derfor behovsprøvast etter formuen til sambuaren.
N
Lånekassen kan vurdere å redusere ein netto positiv formue til den eine av sambuarane med ein eventuell netto negativ formue til den andre. For at den samla netto formuen skal kunne bli vurdert, må utskrift av likninga for det aktuelle likningsåret liggje føre.
N
Dersom det blir dokumentert at ein del av den formuen som kjem fram på likningsattesten, tilhøyrer barna til søkjaren, for eksempel slik at formuen blir disponert av Overformynderiet, skal Lånekassen sjå bort frå denne delen når formuen blir fastsett.
14 UTREKNING AV UTDANNINGSSTIPENDET
14.1
Det er ikkje nødvendig å søkje om lån for å få utdanningsstipend.
14.2
Grunnlaget for å rekne ut utdanningsstipendet per månad (stipendgrunnlaget) er summen av grunnbeløpet i punkt 11, tillegga i punkt 12 og frådraga i punkt 13.
14.3
Det kan ikkje bli gitt utdanningsstipend for dei første kr 4 905 per månad av stipendgrunnlaget. For den delen av stipendgrunnlaget som er større enn kr 4 905 og mindre enn kr 10 760 per månad, blir det gitt 97,2 prosent som stipend (månadssatsen). Månadssatsen blir avrunda oppover til næraste heile fem kroner.
14.3.1
Det samla stipendbeløpet kjem fram ved at månadssatsen blir multiplisert med talet på månader i den utdanningsperioden det blir søkt om stipend for.
14.4
For flyktning i vidaregåande opplæring og for kvinneleg søkjar som får barn, gjeld det særlege reglar, sjå kap. IV punkt 2 og 4.
15 UTREKNING AV LÅNET
15.1
Støtte til desse utgiftene kan berre bli gitt som lån:
15.1.1
skolepengar, til vanleg avgrensa til kr 20 860 per undervisningsår. Det blir ikkje gitt støtte til skolepengar i land utanfor Norden, sjå kap. V punkt 6.
15.1.2
nødvendige utgifter til materiell utover satsane i punkt 12.3. Lånet blir gitt etter nærare reglar, og det er eit vilkår at materiellet er nødvendig, og at utstyret ikkje blir dekt over skolebudsjettet.
15.2
Grunnlaget for å rekne ut lånet er summen av grunnbeløpet i punkt 11, tillegga i punkt 12, eventuelle tillegg i punkta 15.1.1 – 15.1.2 og frådraga i punkt 13. Summen må multipliserast med talet på månader i den utdanningsperioden det blir søkt om lån for.
15.3
Maksimalt lån blir differansen mellom det utrekna grunnlaget i punkt 15.2 og det utrekna utdanningsstipendet i punkt 14.
15.4
For andre stipend enn utdanningsstipendet vil det gå fram av reglane for kvart stipend om beløpet skal trekkjast frå ved utrekning av lånet.
15.5
Det kan bli gitt tilleggslån etter nærare reglar når søkjaren dokumenterer at det har oppstått så ekstraordinære forhold at undervisningsåret ikkje kan bli fullført utan tilleggslån.
N
Med tilleggslån er meint lån utover dei maksimale satsane etter vanlege reglar.
N
Ekstraordinære forhold kan vere f.eks. tjuveri, brann eller annan skade på utstyr og materiell.
N
Alvorlege forhold i familien som krev ekstra heimreise(r) kan komme inn under denne regelen (dødsfall, alvorleg sjukdom).
N
Utgiftene må knyte seg til forhold av ein annan karakter enn dei som inngår i kostnadsnorma. Det kan dermed ikkje bli gitt tilleggslån til husleige, sjølv om leiga blir sett på som svært høg.
N
Tannlegerekningar kan bli godtekne i ekstreme tilfelle (ikkje ordinær tannpleie). Situasjonen må då vere slik at behandlinga av spesielle grunnar ikke kan bli utsett.
16 REISESTIPEND
16.1
I tillegg til støttebeløpet kan bortebuande søkjar få reisestipend til tre reiser tur-retur for eit heilt undervisningsår (ti månader) mellom registrert heimstad (i Folkeregisteret etter lov om folkeregistrering) i Noreg og skolestaden. Stipendet blir gitt som tilskott etter satsane til Lånekassen. Endringar i moderasjonsordningar frå 1. januar 2002 vil ikkje påverke storleiken på reisestipend frå undervisningsåret 2002-03. Det blir gjort eit frådrag på kr 970 per undervisningsår som søkjaren må dekkje sjølv. Det gjeld særlege reglar for reisestipend til land utanfor Norden, sjå kap. V punkt 7. Søkjar som får støtte til fjernundervisning etter kap. I punkt 4.4, kan ikkje få reisestipend.
N
Søkjar som har ei heimstadadresse (registrert adresse) som gir rett til reisestipend, får slikt stipend sjølv om vedkommande bur hos foreldra under utdanninga og ikkje kan få butillegg etter unntaksreglane.
N
Reisestipendet blir rekna per månad. Beløpet per månad blir avrunda oppover til nærmaste heile ti kroner. Ved utrekning av reisestipendet blir månadssatsen multiplisert med talet på månader i søknadsperioden (gjeld også ved støtte utover normalt undervisningsår.)
N
Ved reiser til anna nordisk land blir eigendelen trekt frå dei totale reisekostnadene.
N
Søkjar som studerer i land utanfor Norden, og som melder utflytting, får utanlands reisetillegg (lån og stipend) rekna frå Oslo til studielandet. Det blir ikkje gitt reisestipend for reiser i Noreg/Norden når det er meldt utflytting frå Noreg. Det kan likevel bli gitt reisestipend dersom det er dokumentert at søkjaren måtte melde utflytting frå Noreg fordi studielandet krev det.
N
Søkjar over aldersgrensa får reisestipend til Svalbard berre dersom søkjaren sjølv er registrert i folkeregisteret på Svalbard.
16.1.1
Det kan ikkje bli gitt reisestipend til søkjar som får dekt reiser fullt ut av folketrygda eller frå andre ordningar. Søkjar som får reiseutgiftene delvis dekte frå andre ordningar, kan få redusert reisestipend.
N
Når dekninga frå andre ordningar er lågare enn Lånekassen sine satsar, kan differansen bli gitt som reisestipend.
17 MINSTEBELØP
17.1
Det blir ikkje gitt lån under kr 65 eller berre stipend under kr 35 per månad.