Tettare oppfølging

Eit av dei sentrale måla i utdanningsreforma er å styrke kontakten mellom studentane og lærestaden. Innføring av utdanningsplanar er eitt av bidraga til tettare oppfølging av studentane. Planen skal leggje til rette for at studentane kjem gjennom studiet til normert tid og skal omhandle rettleiing, informasjon og studieplanlegging for den enkelte. Utdanningsplanen skal vere eit verktøy for begge partar ved planlegging og gjennomføring av eit studieprogram. Både fulltids- og deltidsstudentar som tek studium av 60 studiepoengs omfang eller meir, skal vere omfatta av ein utdanningsplan. Unntak er privatistar. Utdanningsplanen er regulert i lov om universiteter og høgskoler § 4-2.

I utdanningsplanens generelle del, som vil vere relativt lik for alle, inngår blant anna ein avtale mellom studenten og universitetet om kva plikter og rettar dei har i forhold til kvarandre. Avtalane skal blant anna vise til sørviserklæringa og gjeldande lover og forskrifter som regulerer forholdet mellom studenten og universitetet. Vidare skal planen vise korleis universitetet legg til rette for at studentane kjem gjennom definerte læringsmål på normert tid og skal synleggjere studentanes ansvar for å oppfylle dei studiekrava som universitetet stiller i form av krav til deltaking, obligatoriske arbeid og studieprogresjon.

I den individuelle delen av utdanningsplanen er det lagt inn informasjon frå studie- eller fagplan for det studieprogrammet studenten er teke opp til. Fagleg innhald og oppbygging av studiet, arbeidsformer, normert studietid og vurderingsformer skal også vere omtalte. Utdanningsplanen viser alle obligatoriske emne, eventuelt anbefalte og valfrie emne innanfor eit studieprogram. Det skal også gå fram kven som er ansvarleg kontaktperson.

Utdanningsplanen skal inngåast ved starten av studiet. Han skal bekreftast kvart semester, og det er ope for å gjere endringar av val undervegs. Planane vil vere nettbaserte og studentane skal kunne endre og bekrefte planane på nettet. Universitetet i Tromsø vil leggje vekt på mulegheit for personleg rettleiing i samband med oppsetting og endring av studieplan.