Fylkka dearvvašvuođageahčču doaimmaha geahču dearvvašvuođabálvalusaid ja dearvvašvuođabargiid hárrái.

Doaimmat leat

• atnit geahču doaimmaid, suohkaniid ja dearvvašvuođaásahusaid guovdu, dábálaččat systemarevišuvnnaid bokte. Juohke jagi šaddet soames geahčut leat mielde riikkaviidosaš geahčus man guovddás Dearvvašvuođageahčču mearrida. Geahčču čađahuvvá maiddái kártemiid ja eará metodaid bokte.
• bearráigeahču olis addit bálvalusaide rávvagiid
• gieđahallat ovttaskas áššiid dearvvašvuođabálvalusa váilevašvuođaid birra. Diekkár áššit sáhttet álggahuvvot pasieanttaid váidimiid vuođul, dahje omd. mediaáššiid ja eará dearvvašvuođaossodagaid cavgilemiid vuođul jna. Áššiid boađus sáhttá leat reakšuvdna dihto dearvvašvuođabargiid vuostá dahje doaimma moaitin.
• gieđahallat váiddaáššiid álbmoga vuoigatvuođaid birra – vuosttažettiin divššohasvuoigatvuođa lága ja gielddaid dearvvašvuođabálvaluslága olis
• vuostái váldit ja árvvoštallat dieđáhusaid vaháguvvamiid, boasttogeavvamiid ja dáhpáhusaid birra mat livčče sáhttán boastut geavvat  (§ 3-3 spesialista-dearvvašvuođalágas)
• vuostái váldit ja árvvoštallat dieđuid njoammuneastadeami ja eará surggiid hárrái

Fylkkaid dási dearvvašvuođageahču deaŧaleamos láhkavuođđun lea láhka dearvvašvuođabálvalusaid stáhtalaš bearráigeahču birra, mas §:in 2 ja 3 ee. daddjo:

“Fylkka dearvvašvuođageahčču galgá atnit geahču olles dearvvašvuođasurggiin ja buot dearvvašvuođabargiid guovdu miehtá fylkka ja galgá geahču oktavuođas maiddái rávvet, bagadit ja addit dieđuid mat váikkuhit dasa ahte álbmoga dárbbut dearvvašvuođabálvalusaid dáfus devdojuvvojit.
Fylkka dearvvašvuođageahčču galgá dađistaga dieđihit Stáhta Dearvvašvuođagehččui fylkka dearvvašvuođadilálašvuođaid ja eará oktavuođaid birra mat váikkuhit daid.

---

Fylkka Dearvvašvuođageahčču galgá fuolahit ahte buohkat geat fállet dearvvašvuođabálvalusaid leat ásahan siskkáldas bearráigeahččandoaimma ja dárkkistit iežaset doaimma dainna lágiin ahte eastadit boasttogeavvamiid dearvvašvuođabálvalusas.”

Ollislaš govva, das makkár váldi fylkka Dearvvašvuođageahčus lea, boahtá ovdan válddi logahallamis lágain ja njuolggadusain.

Sosiálbálvalusa bearráigeačču gullá fylkkamánni váldái, mii maiddái gieđahallá váidagiid sosiálbálvalusa hárrái.

Ođđajagemánu 1. beaivvi 2003 rájes leat fylkkadoaktárat časkon oktii fylkkamánneámmáhiiguin, muhto bearráigeahččoáššiin leat fylkkaid Dearvvašvuođageahčut, maid fylkkadoaktárat jođihit, fágalaččat sirrejuvvon fylkkamánnis ja leat njuolga Stáhta Dearvvašvuođageahču vuollásaččat.

Fylkkarájiid rasttideaddji dearvvašvuođaásahusaid geahčus ovttasbarget fylkkaid dearvvašvuođageahčut nu ahte geahččoeiseválddit doibmet ovttas daid ektui geaidda geahčču guoská. Davvi Dearvvašvuođaregiovnnas oktiiheiveha Tromssa Dearvvašvuođageahčču gulahallama Helse Nord RHF:in (Davvi Dearvvašvuođain)

Liŋkkat (dárogiel siidduide, earret maŋŋemus)  

• Geahčču – dieđut ja mearrádusat – dieđut metodaid, bohtosiid ja mearrádusaid birra
• Systemadárkkisteamit – metoda j.e.
• Geahčču dearvvašvuođabargiid hárrái
• Dearvvašvuođageahču birra – dárkilet dieđut organisašuvnna, válddi juogu, historihká birra jna
• Váldi addon fylkka dearvvašvuođagehččui lágáid ja láhkaásahusaid olis
• Vuoigatvuođat ja váidimat – oanehaččat iešguđet vuoigatvuođaid ja váidin- ja buhtadusvejolašvuođaid birra