|
Vuoigatvuohta oažžut doarjjaolbmo
Sosiálabálvaluslága § 4-2 mielde lea doarjjaolmmoš sierra bálvalus mii galgá veahkehit dan gii dárbbaša mávssolaš astoáiggi oažžut. Doarjjaolmmoš sáhttá maid addit rávvagiid gieđabirasbargguid doaimmahettiin, omd. go gávppaša ja movt oaivválaččat atnit ruđa, muhto ii leat eaktuduvvon ahte sus galget leat dađi viidát oahpahanbarggut. Doarjjaolbmo deaŧaleamos doaibman lea oktavuohta ja doarjja geavaheaddji dáhtu mielde.
Doarjjaolbmo sáhttet dárbbašit mánát, nuorat ja rávisolbmot geain leat psyhkalaš váttisvuođat, nuorra ja vuorraset doaimmashehttejuvvon olbmot, sisafárrejeaddjit geat vuos eai dovdda Norgga servodaga, bearrašat main leat moalkás váttisvuođat ja gárrenmirkogeavaheaddjit.
Gii lea doarjjaolmmoš?
Doarjjaolmmožin sáhttá leat priváhta olmmoš geas ii leat makkárge erenoamáš fágaduogáš. Doarjjadoaibman lea veahkehit dárbbašeaddji beassat vásihit mávssolaš astoáiggi, ja muhtomin maiddái addit peršovnnalaš rávvagiid ja veahki.
Bálvalus ferte veardiduvvot eará suohkanlaš astoáigedoaimmaid ektui, mat eai dárbbaš leat doaimmat maid sosiálabálvalus lágida, muhto sáhttet maiddái leat doaimmat maid kulturossodat lágida. Suohkaniin lea dábálaččat beroštupmi oažžut oktavuođa olbmuiguin geat dáhtoše doaibmat doarjjaolmmožin. Olu doarjjaolbmot ožžot bagadeami bargoaddis.
Muhtun suohkanat leat organiseren doarjjaolmmošbálvalusa nu ahte máŋgga geavaheaddjis lea seamma doarjjaolmmoš. Individuála árvvoštallama vuođul, ja go ieš leat beassan dovddáhit maid don dáhtut, de sáhttá dát leat vuogas ortnegin.
Doarjjaolmmoš oažžu bálkká suohkanis. Doarjjaolbmo veahkki lea nuvttá, muhto geavaheaddji ferte ieš máksit iežas goluid dan botta go servvoštallá doarjjaolbmuin, ovdamearkka dihte vuojadanáiggi mávssu, sisabeassanmávssu, borramuša jna..
Ohcan ja váidda
Doarjjaolbmo ohcan ovddiduvvo suohkanii. Suohkan galgá dahkat mearrádusa ohcamuša hárrái, ja čilget makkár ja man olu veahkki fállojuvvo. Jus ohcci oaivvilda ahte suohkana fálaldat ii govčča sosiála bálvalusa dárbbu, de sáhttá son váidit suohkana mearrádusa. Fylkkamánni lea váidinásahus. Váidda sáddejuvvo suohkanii.
Liŋkkat
Maŋemus rievdaduvvon 19.4.2004
|