”Media i Volda” er truleg den mest kjende fagutdanninga for medieyrke i Noreg. Heilt sidan  1971 har det som i dag er Avdeling for mediefag (AMF) ved Høgskulen i Volda utdanna fagfolk til norsk mediebransje. AMF har treårige bachelorutdanningar i journalistikk, informasjon og media og i animasjon. I tillegg tilbyr AMF ei eittårig utdanning i fjernsynsreportasje og dokumentar. Medievitskap er ein del av bachelorutdanningane, og studentane får tilbod om valfrie, mediefaglege emne. Mange av våre studentar reiser til universitet i utlandet og studerer eitt eller to semester. I alt har avdelinga om lag 250 studentar.

Det er om lag 30 tilsette og engasjerte ved avdelinga, og i tillegg kjem stipendiatar, kurshaldarar og gjesteførelesarar. Dei tilsette driv aktivt med forsking og fagleg utvikling, og den tyngste satsinga er for tida prosjektet ”Journalistikk i endring: Ny teknologi, ny økonomi – nytt samfunnsoppdrag?” Det tekniske utstyret er moderne og tilgjengeleg for studentane heile døgnet, heile veka. I utdanningane blir det lagt vekt på at teori og praksis skal gå hand i hand, og kontakten med dei ulike bransjemiljøa er tett og god, ikkje minst gjennom ei anerkjend praksisordning.

Interessert i å søke til opptaket i 2008? Poenggrenser for opptak finst på Samordna opptak sine sider. Vend deg til Studentkontoret når du vil ha søkadsskjema.

Ekspedisjon:  i 2. etasje, Aasen-huset Tlf:70 07 50 69 Fax: 70 07 50 52 Post: Høgskulen i Volda Avdeling for mediefag Postboks 500 6101 Volda