Forsking og utvikling / Forsking ved HVO / Forskingsprosjekt / Journalistikkens samfunnsoppdrag

Den fullstendige tittelen på prosjektet er: "Journalistikk i endring: Ny teknologi, ny økonomi, nytt samfunnsoppdrag?"

Prosjektet er finansiert av Noregs Forskingsråd og Høgskulen i Volda og blir gjennomført i åra 2007 til 2010. Den samla ramma for prosjektet er ca. 11 millionar kr, der Noregs Forskingsråd bidreg med ca. 5 millionar kr. Prosjektleiar er førsteamanuensis dr.polit. Johann Roppen.

Utgangspunktet for prosjektet er at journalistrolla i dag er inne i store endringar som følgje av tekniske, økonomiske og politiske endringar. Følgjene desse endringane har for redaksjonelle prosessar blir undersøkt ved å studere eit utval av redaksjonar i eit tett integrert prosjekt. Som journalistlærarar med lang tids røynsle i å drive redaksjonelle prosessar og å evaluere medieprodukt har fagmiljøet ved Avdeling for mediefag gode føresetnader for å studere arbeidsmåtane til journalistar.

Prosjektet vil bli gjennomført som tre delprosjekt: Ketil Jarl Halse er ansvarleg for eit delprosjekt om journalistiske arbeidsmåtar, Johann Roppen er ansvarleg for eit delprosjekt om leiing og kompetanse og Svein Brurås er ansvarleg for eit delprosjekt om etikk og yrkesideologi. Kvart av dei tre delprosjekta vil i tillegg ha tilknytt ein stipendiat og ein eller fleire andre forskarar i delar av prosjektperioden. Stipendiat Jan Fredrik Hovden får post.doc midlar på prosjektet. Han arbeider no med ei doktoravhandling om det norske journalistiske feltet. Dosent II Nils E. Øy vil også vere med i det faglege arbeidet på prosjektet. Øy er til dagleg generalsekretær i Norsk Redaktørforening. Høgskulen i Volda er i ferd med å tilsette ein professor II i journalistikk som også vil vere engasjert i prosjektet.

Som konkrete forskingsresultat skal det publiserast ca. 15 artiklar i vitskaplege tidsskrift, ei fagbok i journalistikk, ein vitskapleg konferanse i 2009 og eit større tal aviskronikkar og innlegg på vitskaplege konferansar.

Ei meir utførleg omtale av prosjektet finst i søknaden til Noregs forskingsråd.

http://stilling.recruiter.no/lists/vacPos.aspx?jobId=55694&clientId=1689

Skriv ut