Báiki: Radisson SAS hotell, Tromsø

Duogáš: Konferánssa duogáš lea dutkanstáhtusa kártenbargu siskkobealde sámi ja eamiálbmotguoskevaš suorggi. Sámi dutkamiid guovddáš lea doaimmahan dán barggu Norgga dutkanráđi sámi dutkan prográmmastivrra ovddas. Dán kártenbarggus leat válljejuvvon ovdánaniešvuođat buohtastahttojuvvon nugo dutkanfáddá/guovlu, ásahusoktavuohta, dutkanovttasbargu, almmuhusat ja ruhtadeapmi. Deattuhuvvo ahte čađahuvvon kártenbarggu galgá geahččat kártenneavvun ja ii fal gárvves buvttan.

Ulbmil ja sisdoallu: Vuolggasadjin lea guovddáža kártenbargu mii álggahusas ovdanbuktojuvvo. Hálidat divaštallat ovdánaniešvuođaid birra, čujuhit dutkandárbbu ja vejolaš doaibmabijuid siskkobealde dán dutkansuorggi. Gažaldagat mat sávvojuvvojit divaštallot leat earret eará mo fáttálaš čohkkehus lea, ja mo fágáidrasttideaddji dutkanprošeavttaid viidodat lea prošeavttaid ektui mat leat juhkkojuvvon árbevirolaš suorggi mielde. Logaldallit leat bivdojuvvon čielggadit sin fáttáid kártenbarggu bohtosiid ektui.

Konferánssa ulbmil lea fállat ságastallama hástalusaid birra ja boahtteáiggevejolašvuođaid birra mat gustot nannet ásahusa dutkanstrategiijaid ja vuoruhemiid. Vai leat buoret ráhkkanan duostut boahtteáigge hástalusaid, de fertet identifiseret sámi ja eamiálbmot dutkama čuolmmaid. Konferánssa vuosttaš beaivve divaštallojuvvo vásáhusat dutkanfierpmádagain, dutkanovttasbargguin ja gaskkustemiin sihke davviriikalaš ja náššuvnnalaš dásis. Viidáseappot guovdilastojuvvo dutkanpolitihkalaš ulbmilat ja hástalusat sihke dutkanprošeavttain ja fierpmádatbargguin, dásvuolde “foresight” ja gulahallanvuođu bargovuogit sáhttet leat ávkkálaš vuolggasajit nannet čohkkejuvvon dutkansuorggi. Konferánsa loahpahuvvo panelain mas oassálastit iešguđetlágan geográfalaš ja fágapolitihkalaš vuođuin álggahit divaštallama.

Ulbmiljoavku:Konferánsa lea rabas buohkaide, muhto lea daid várás geat barget dutkanstrategiija bargguiguin, sihke dutkit ja hálddahuslaš bargit.

Konferánsagiella lea skandinávalaš gielat ja sámegiella. Norgga dutkanráđđi lea ruhtadan konferánssa oktan Romssa universitehta doarjagiin.

Eambbo dieđuid, geahča prográmma.

Dieđihanáigemearri lei cuoŋománu 27. b. 2004. Dieđiheapmi lea geatnegahtti.

Dearvuođaiguin
Else Grete Broderstad
Hálddahusjođiheaddji,
Sámi dutkamiid guovddáš