Organiseringa av politi- og lensmannsetaten

Politi- og lensmannsetaten i Norge har rundt rekna 12 000 tilsette. Saman dannar dei ei einhetleg politistyrke. Den byggjer på ei allsidig politiutdanning som set norske politifolk i stand til å løyse alle typar politioppgåver. Politiutdanna kan arbeide med alt frå etterforsking til patruljering og ordensteneste. I tillegg har politiet spesialistar og spesialeiningar innanfor ulike fagfelt. Justisdepartementet har det øvste ansvaret for verksemda til politiet, og legg rammene med sine planar, mål og løyvingar. Departementet har delegert store delar av ansvaret til Politidirektoratet. Politidirektoratet har ansvar for fagleg leiing, styring, oppfølging og utvikling av politidistrikta og politiets særorgan. Direktoratet er overordna myndigheit og næraste støttespelar for politidistrikta og særorgana. Politidirektoratet har rundt 130 tilsette.

Politidistrikta

Politi- og lensmannsetaten er delt inn i 27 politidistrikt. Kvart av dei er delt inn i politistasjonsdistrikt og lensmannsdistrikt. Kvart politidistrikt er leia av ein politimeister som har ansvaret for all polititeneste, budsjett og resultat. Talet på oppklara saker, oppklaringsprosent, sakshandsamingstid og førebyggande arbeid er døme på område kor resultata vert målt. Politistasjonsdistrikt og lensmannsdistrikt er underliggande einingar som vert leia av politistasjonssjefar og lensmenn. Kvart politidistrikt har eigen administrasjon og felles operasjonssentral. Operasjonssentralen tek imot alle oppdragsmeldingar om ulukker, naudsituasjonar, andre farlege situasjonar, og når det elles er trong for øyeblikkeleg hjelp. Her har dei oversikt over det meste som skjer i distriktet og kan raskt dirigere politipatruljer og andre som er på vakt dit dei trengst.