Brann- og ulukkesvern, 2013

Det har vore ein liten auke i brutto driftsutgifter til brann- og ulukkesvern i kommunane frå 2012 til 2013. I 2013 blei det brukt i alt 4,7 milliardar kroner på tenesteområdet, ein auke på 7 prosent frå 2012. Utviklinga dei siste fem åra, frå 2009 til 2013, viser ein vekst i utgiftene på om lag 20 prosent, Utgiftsveksten held seg på om lag same nivå som på andre tenesteområde i KOSTRA.

Høgast utgifter til beredskapsføremål

Den største utgiftsposten i brann- og ulukkesvernet i kommunane er beredskap mot brannar og andre ulukker. I 2013 blei det brukt nesten 3,8 milliardar kroner på driftsutgifter til brannvesen, oljevernberedskap og anna beredskap mot brann- og eksplosjonsarta ulukker med vidare. I 2012 summerte tilsvarande utgifter til beredskapsføremål seg til i overkant av 3,5 milliardar kroner. Det inneber ein utgiftsvekst på over 7 prosent frå 2012 til 2013, og 17,4 prosent frå 2009 til 2013.

Kommunanes utgifter til førebygging av brannar og andre ulukker er, som tidligare år, på eit lågare nivå enn utgiftene til beredskap. I 2013 gjekk det med litt over 900 millionar kroner til førebygging i form av drift av feiarvesen og andre tiltak som skal førebygge brann og eksplosjonsarta ulukker. Det inneber ein auke på 5,4 prosent frå 2012 og på 27,8 prosent dei siste fem åra.

Fleire brannar

Det har vore ein auke i talet på brannar i Noreg frå 2012 til 2013. Det totale talet på bygningsbrannar i 2013 var 4 437. Dei fleste av desse var bustadbrannar, med 64,5 prosent. Jamført med folketalet er talet på bygningsbrannar 0,9 brannar per 1 000 innbyggarar. Talet på brannar varierer litt frå eit år til eit anna, og auken frå 2012 til 2013 var på om lag 4 prosent. Ifølgje Direktoratet for samfunnstryggleik og -beredskap, som sørgjer for å innhente informasjon om brannar frå lokale brannvesen rundt om i kommunane, er det av ulike årsaker grunn til å tru at det er noko underrapportering av brannar. Direktoratet arbeider difor blant anna med å utvikle eit rapporteringssystem som kan bidra med betre rapportering av denne typen av informasjon.

Kommunale brann- og feiarvesen skal sørgje for at det blir ført tilsyn med mellom anna bygningar og område der brann kan innebere tap av mange liv. Det gjeld til dømes i institusjonar, sjukehus og barnehagar, og desse einingane blir gjerne omtala som A-objekt. I 2013 blei det gjennomført tilsyn med 81,9 prosent av alle A-objekta i landet, noko som tilseier at tilsynsverksemda på landsnivå er på same nivå som i 2012. Det er elles slik at det blir stadig færre (aktive) piper rundt om i landet og stadig fleire andre typar av fyringsanlegg. Det gjeld til dømes auken i bruk av varmepumper i private hushald. Det kan gjere at rapportering og publisering av tilsynsverksemd blir annleis i framtida.

Flest årsverk knytt til beredskap

Talet på årsverk som går med til brann- og ulukkesvern, held seg relativt stabilt over tid. Dei fleste av årsverka, om lag 70 prosent, går med til beredskapsarbeid. I 2013 var det i alt 3 744 årsverk som anten gjekk med til beredskap eller førebygging av brannar og ulukker, ein auke på 1 prosent frå 2012. Samanlikna med fem år tilbake, har auken i årsverk vore på 9,6 prosent frå 2009 til 2013.

Årsverk til førebyggande arbeid inkluderer mellom anna feiarar. Det har blitt færre årsverk av feiarar dei siste åra, høvesvis 691 feiarårsverk i 2012 og 679 i 2013. Samstundes har delen piper som blei feid gått ned frå 44,5 prosent i 2012 til 41,3 prosent i 2013. Det er likevel grunn til å peike på at nokre brannvesen gir uttrykk for at ressursar sett av til beredskap òg blir nytta til førebygging.