|
 |
Prosjektgruppa for Prøvekluten ved Høgskulen i Volda, i samarbeid med Møre og Romsdal fylkeskommune, inviterer komande torsdag til dialogseminar med fokus på produksjon og formidling av kunst og kultur til skuleverket.
Målsetjinga for seminaret er å fremje dialog mellom kunst-/ kulturinstitusjonar og produksjons-/formidlingsmiljøa på regionalt og nasjonalt plan, auke forståinga for behov for kunst- og kulturproduksjonar som Den kulturelle skulesekken fører med seg og vidareutvikle konseptet for eit senter for kulturproduksjon og kulturformidling i Volda
Innleiarar/ program:
Innleiarane representerer ulike kunst- og kulturinstitusjonar/- organisasjonar på regionalt og nasjonalt plan. Mellom anna vil Astrid Holen, sekretariatsleiar for det nasjonale Sekretariatet for Den kulturelle skolesekken ved ABM- utvikling i Oslo snakke om mål og verkemiddel i Den kulturelle skulesekken, basert på resultat frå den ferske rapporten utført av NIFU STEP, ”Ekstraorinært eller selvfølgelig?- evaluering av Den kulturelle skolesekken i grunnskolen”.
Gjennom deltakarar frå tre ulike fylkeskommunar vil tilbod og etterspurnad i Den kulturelle skulesekken verte sett lys på. Innleiarar på dette temaet er Tormod Gangfløt, leiar for Delta K Østfold, Maria Bang, dagleg leiar for Turnèorganisasjonen for Hedmark og koordinator for Den kulturelle skulesekken i Møre og Romsdal Johild Kosberg Bredin.
Prosjektleiar for Senter for kulturproduksjon og kulturformidling Jan Driveklepp vil presentere planane for eit slikt senter ved Høgskulen i Volda.
Seminaret vil verte avslutta med ein paneldebatt om kvantitet, kvalitet og formidling i åra framover. Paneldeltakarar vil mellom anna vere Aud Folkestad, leiar for Fagleg utval for barne- og ungdomskultur i Norsk kulturråd, Arvid Blindheim, kulturdirektør i Møre og Romsdal, Joachim Frivold frå Norsk Filminstitutt og Liv Dysthe Sønderland, leiar for Norske Billedkunstnere i Møre og Romsdal.
Seminaret finn stad i teatersalen på Henrik Kaarstad- huset ved Høgskulen i Volda.
Dersom du ynskjer å delta, ta kontakt med koordinator for seminaret: Beatelm@hivolda.no innan onsdag 22.11. kl. 12.00
Program for seminaret (i pdf-format) |
|
