|
Universitets- og høgskolerådet (UHR) har fått i oppdrag frå UFD å koordinere arbeidet med å utvikle eit system for rapportering av data for vitskapleg publisering basert på bruk av bibliografiske data og autoritetsregister. Eit utval har arbeidd med å utvikle system for betre forskingsdokumentasjon, og sluttrapporten låg føre i desember 2004. Eit besøk på UHR sine sider om prosjektet - Dokumentasjon av vitenskapelig publisering - kan også løne seg. Her ligg det samla mykje bakgrunnsstoff, m.a. lister over publikasjonar som blir rekna som vitenskaplege.
Eit resultat av dette arbeidet er ITAR - ei teknisk løysing som inneheld autoritetsregister for vitskaplege publikasjonskanalar, publikasjonsformer og institusjonar. Den inneheld også data om vitskaplege publikasjonar frå ulike dataleverandørar (ISI, Norart, BIBSYS). NSD har ansvaret for praktisk tilrettelegging og drift.
Ny versjon av Forskdok
Fornying skal føre til forenkling, og ein kan berre håpe at sluttbrukarar vil sitte igjen med den kjensla. ITAR vil levere data om vitskaplege publikasjonar til Forskdok, men desse vil vere utan personopplysingar. Den enkelte institusjon må difor påføre desse. Og kva betyr det for fagleg tilsette? Den enkelte finn fram sine postar i Forskdok og påfører desse personnamn, dvs. forfattar (ein eller fleire). Dette gjeld berre vitskaplege publikasjonar - andre publikasjonar må registrerast som før, berre at skjemaet vil vere nytt og vonleg enklare å bruke/forstå. Meir informasjon om nye rutinar kjem når ny versjon er på plass. For dei vitehuga som tykkjer ventetida blir lang, kan Nyhetsbrev frå BIBSYSForskDok vere til hjelp.
|
