Jus dilálašvuohta fáhkka rievdá, ja seammás lea doaivva ahte ohcci fargga ruđaiduvvá nu ahte ieš birgegoahtá, de sáhttá ekonomalaš doarjja ráddjejuvvot unnimusmearrái. Dalle sáhttá juolluduvvot doarjja eallindárbbuide nu go borramuššii ja áibbas dárbbašlaš peršovnnalaš diŋggaide, ja rehkegiidda mat fertejit máksot vai ovdamearkka dihte el-fápmu ja sullasaččat eai bissehuvvo.

 

Fáhkkaveahki ohcan ferte jođánit meannuduvvot, eandalii seamma beaivvi go lea ovddiduvvon. Dalle ii sáhte sosiálabálvalus iskat ášši nu dárkilit go dábálaš ohcamiid oktavuođas dahká. Jus ohcan ovddiduvvo ovdal vahkkoloahpa, ja ohcci ii loga alddis biebmoruđa ge, dahje jus ii loga alddis leat oađđensaji, de ferte ášši árvvoštallojuvvot dastánaga. Ohcan mii ovddiduvvo fáhkkadilálašvuođaid oktavuođas, ii sáhte biehttaluvvot dahje hilgojuvvot dainna ákkain ahte ohcci sáhttá váldit oktavuođa nuvttá doarjjafálaldagaiguin dahje sullasaččaiguin.

 

Olbmos sáhttá leat vuoigatvuohta oažžut veahki erenoamáš fáhkkadilálašvuođain beroškeahttá das lea go ohccis vuoigatvuohta oažžut veahki § 5-1 olis. Dalle oaivvilduvvo veahkki mii lea oalle sakka ráddjejuvvon, ovdamearkka dihte jus ohcci lea guhkkin eret ruovttubáikkistis, eai ge leat dat vejolašvuođat mat ruovttus livčče. Dát vuoigatvuohta gusto buohkaide, beroškeahttá orrunbáikkis, ja ekonomalaš dilis nu go sisaboađus ja opmodagas.

 

Ohcan sáddejuvvo suohkanii. Fylkkamánni lea váidinásahus. Váidda ovddiduvvo suohkanii.