|
Fylkkaid dearvvašvuođageahčču čađahii 2004:s riikkaviidosaš geahču dearvvašvuođabálvalusaid hárrái easkkaboahtán dorvoohcciide, báhtareddjiide ja bearašovttastahttojuvvomiidda geat Norgii bohtet riikkain gos tuberkulosa lea dábálaš. Geahčču čađahuvvui 55 suohkanis ja deaŧaleamos suokkardanfáddán ledje:
- Čuvvot go suohkanat tuberkulosadárkkisteami njuolggadusaid
Ollu suohkaniin váilu dárbbašlaš diehtu das man ollu easkkaboahtán olbmot sis leat ja geat dat leat, ja nu eai deavdde tuberkulosanjuolggadusa gáibádusa das ahte vejolaš buohccit galget identifiserejuvvot dihto áigemeari sisa. Geahčču datte vuohttá čielgasit ahte olbmot geain leat dovdomearkkat mat sáhttet boahtit tuberkulosas bures čuovvoluvvojit ja jođánit čujuhuvvojit spesialistadearvvašvuođadikšui.
- Addojuvvojit go dieđut dearvvašvuođabálvalusa ja dárbbašlaš
dearvvašvuođaveahki birra njoammudávddaid, áhpehisvuođa ja psyhkalaš váttuid hárrái.
Njealjádasoassi suohkaniin eai lean fuolahan ahte buot easkkaboahtán olbmot ožžot dieđud dearvvašvuođageahču birra. Juohke viđát suohkanis fuomášuvvoje váilevuođat fáláldagaid hárrái easkkaboahtán olbmuide eastadandoaimmaid ja iskkademiid birra njoammudávddaid hárrái.
Geahčču čájehii maiddái ahte suohkaniin leat hui iešguđetlágánvuođat das movt psyhkalaš váttut fuomášuvvojit ja čuovvoluvvojit dohkálaš vugiid mielde. Váilevaš dearvvašvuođafálaldat psyhkalaš buhcciide sáhttá dagahit sakka stuorát váikkuhusaid dáid olbmuid guovdu go buhcciid guovdu geain lea Norgga servodatduogáš. Áhpeheamit ja riegádahtti nissonat gal ožžot dárbbašlaš dearvvašvuođaveahki.
Riikka suohkanat berrejit guorahallat iežaset rutiinnaid das movt áigges áigái galget diehtit geat ain leat fárren suohkanii, vai sáhttet čađahit dohkálaš tuberkulosa-iskkademiid ja sihkkarastit dieđuid ja dárbbašlaš dearvvašvuođaveahki olbmuide geat dan dárbbašit, maiddái ovdal go leat ožžon fástadoaktára.
Maŋemus ođastuvvon 28.2.2005
|