|
Stáhta dearvvašvuođageahčču háliida dáinna raporttain gaskkustit iežamet vásáhusaid geahčus mii lea leamaš dearvvašvuođafálaldagaid hárrái olbmuide geain leat psyhkalaš gillámušat. Raporttas bohtet ovdan makkár hástalusaid spesialistadearvvašvuođabálvalus ja suohkanat deaividit, ja gokko min mielas berre lasihit resurssaid ja gelbbolašvuođa buoridan dihte fálaldaga.
Raporttas bohtet ovdan vásáhusat ja gávdnosat geahčuin 2005:s ja 2006:s. Doppe čilgejuvvojit vásáhusat, árvvoštallamat ja oainnut mat leat boahtán ovdan ságastallamiin muhtun fylkkaid Dearvvašvuođageahčuiguin ja fylkkamánniiguin. Loahpas árvvoštallojuvvojit geahččovásáhusat ođđaset dutkan- ja evaluerengirjjálašvuođa olis.
Ollu suohkanat ja ásahusat rahčet bargiid rekrutteremiin ja doalahemiin, ja maiddái dohkálaš fálaldagaid organisermiin oalle iešguđetlágán olbmuide. Váikkuhussan dás lea ahte soames joavkkuide lea váddáseabbo oažžut fálaldaga, ja ahte lea unnán ulbmillaš bargu. Vaikko fálaldat lea ollu jagiid nannejuvvon, de lea ain váilevaš bálvalus oallugiidda geat dárbbahivčče viiddis ja máŋggabealat fálaldagaid, ja dat leat unnán heivehuvvon dárbbuide. Dan dihte berre árvvoštallojuvvot leat go váikkuhandoaimmat doarvái buorit.
Geahččoeiseválddit fuolastuvvet dainna go máŋgga sajis lea unnán máhttu njuolggadusaid birra, ja go maiddái lea unnán áddejupmi dasa ahte njuolggadusaid ulbmil lea sihkkarastit dohkálaš divššu ja vuhtii váldit vuđolaš riektesihkarvuođa.
Stáhta dearvvašvuođageahčču ávžžuha guoskevaš departemeantta árvvoštallat čavget suohkaniid geatnegasvuođa háhkat ruovttuhis olbmuide, geain leat psyhkalaš gillámušat, orrunsaji vuoigatvuođa nannema bokte. Psyhklaš dearvvašvuođa buorideami plána (Opptrappingsplanen for psykisk helse) olis berre árvvoštallojuvvot movt sihkkarastit dárbbašlaš gelbbolašvuođa buot dásiin. Bálvalusain lea iešheanalis geatnegasvuohta buoridit ovttasdoaibmama iešguđet surggiid ja dásiid gaskka, ja dáidá maid leat dárbbašlaš čuovvolit gustovaš ovttasbargošiehtadusaid suohkaniid ja dearvvašvuođadoaimmahagaid gaskka, gč. St.prp. nr. 1 (2004-2005).
|