|
Raporttas čujuhuvvo guovddáš diehtogálduide gárrenmirkogeavaheddjiid dearvvašvuođadilálašvuođa birra, ja muitaluvvo dearvvašvuođabálvalusaid birra maid dát divššohasat ožžot ja man muddui bálvalusat leat fállun. Váldodeaddu lea biddjon alkohola- ja narkotihka garra geavaheddjiide. Okta ulbmilin raporttain lea leamaš árvvoštallat man muddui olahahtti diehtogáldut gárrenmirkogeavaheami birra dahket doarvái vuođu geahččoeiseváldiide čađahit bistevaš goziheami dán suorggis.
Nubbin guovddáš ulbmilin dieđuid čohkkemiin lea leamaš árvvoštallat leat go doppe suorggit gos lea stuora várra bázahallat dearvvašvuođapolitihkalaš mihtuid ja eiseváldiid gáibádusaid ektui.
Dieđut mat leat čohkkejuvvon, čájehit ahte:
- Olahahtti kártenvuogádat, registarat ja eará státistihkat leat menddo váilevaččat dasa ahte sáhttit oktiilaččat čađahit geaču gárrenmirkosuorggis.
- Dat materiála mii lea čohkkejuvvon guovddáš ja guovllulaš geahččodoaimmain, iešguđet dutkanraporttain, almmuhemiin jna. čájehit ahte geahču árvvoštallamiid mielde ii leat dilli doarvái buorre gárrenmirko-geavaheddjid dearvvašvuođadilálašvuođa ja daid fálaldagaid hárrái maid sii ožžot.
- Váldogovva lea ahte ollu gárrenmirkogeavaheaddjit eai oaččo bálvalusaid maid dárbbašivčče. Erenoamáš fuolastuhttin leat váilevaš bálvalusat garra gárrenmirkogeavaheddjiide, sin dearvvašvuođaváttisvuođaid ektui ja dan ektui go sin gaskkas leat ollu duođalaš psyhkalaš ja somáhtalaš gillámušat ja jápmin deaivida dávjjit go eará joavkkuin.
Dearvvašvuođageahčču áigu gárrenvuođasuorggi viidáset geahčus erenoamážit čalmmis atnit bálvalusaid olamuttu, dikšunfálaldagaid dohkálašvuođa, dikšunásahusaid siskkáldas ja gaskaneas ovttasdoaibmama, ja movt bálvalusat lágidit dilálašvuođaid mieldeváikkuheapmái, diehtogaskkusteapmái ja mieđiheapmái.
Maŋemus ođastuvvon 28.2.2005
|