Almmuhuvvon raporttas čoahkkáigeassá Stáhta dearvvašvuođageahčču gávnnahemiid ja vásáhusaid suohkanlaš dikšun- ja fuolahusdoaimmaid geahčus 2003-2004. Geahču gávnnahemiid ja vásáhusaid viiddis árvvoštallama ja guorahallama bokte dáhttu Dearvvašvuođageahčču leat mielde válddahallame osiid suohkanlaš sosiála- ja dearvvašvuođabálvalusas, ja fuomášuhttit vejolaš rašes beliid, namalassii gokko sáhttá leat várra ahte bálvalus ii deavdde mearriduvvon lágaid ja njuolggadusaid gáibádusaid.
Raporta lea njealji oasis:
- I. oasis leat ođđa analysat maid dutkaninstituhtta NOVA lea čađahan Stáhta Dearvvašvuođageahču ovddas (eai almmuhuvvon ovdal). Analysa lea čađahuvvon čohkkejuvvon materiála vuođul našovnnalaš iskkadeamis ”Dikšun- ja fuolahusbálvalus suohkaniin, bálvalusaid vuostáváldit, veahkkedárbbut ja fálaldagat”, ja dieđuid vuođul čohkkejuvvon NOVA galledemiin suohkaniin iežas dárogillii namuhuvvon LAG-studias (LAG – Livsløp, aldring og generasjon, sámegillii: Eallingeardi, boarásmuvvan ja buolva)
- II. oasis lea Dearvvašvuođageahčču árvvoštallan NOVA analysaid bohtosiid.
- III. oasis leat ovttastuvvon 2003 ja 2004 eará gávnnaheamit ja vásáhusat mat gusket suohkanlaš dikšun- ja fuolahusbálvalusaid dási árvvoštallamii
- IV. oasis lea raportta I–III osiid gávnnahemiid ja vásáhusaid čoahkkáigeassu ja árvvoštallan, ja guoská suohkanlaš beliide dikšun- ja fuolahusbálvalusas mat geahččoeiseváldiid mielas sáhttet leat rašit ja gokko sáhttet čuožžilit váilevuođat.
Raporta lea oassin Dearvvašvuođageahču doaimmas mii sisttisdoallá surggiid bearráigeahččamii. Surggiid bearráigeahččan lea geahčču váldoáššiid perspektiivvas ja lea bearráigeahččama ulbmiliin dieđuid háhkan sosiála- ja dearvvašvuođabálvalusaid birra, ja daid systemahtiseret ja dulkot.
Maŋemus ođastuvvon 17.10.2005
|