|
Jagis 2004 leat registrerejuvvon 2 056 dáhpáhusa maid lei geatnegasvuohta dieđihit Fylkka dearvvašvuođagehččui, spesialistadearvvašvuođabálvaluslága § 3-3 mielde (registerejuvvon pr. juovlamánu 1. b. 2005).
Dieđihemiid lohku lea 2001 rájes 2004 rádjái lassánan 51 proseanttain.
Sullii goalmmádasoassi dieđiheamiin leat mearkkašahtti olmmošvaháguvvamat, ja badjel bealli dieđihemiin ledje dilálašvuođaid birra mat livčče sáhttán dagahit mearkkašahtti vahága olbmuide.
Leat registrerejuvvon 176 dieđáhusa eahpelunddolaš jápmimiid birra. 40 proseanttas dáin dieđihemiin lea registrerejuvvon ahte jápmin dáhpáhuvai dearvvašvuođaveahki attidettiin, ja 41 proseanttas lea registrerejuvvon ahte olmmoš jámii iešdagolaš vahágahttimiid geažil.
Njealjádasoasis buot dieđihemiin leat dáhpáhusat maid sivvan lea dálkasiid boasttu geavaheapmi.
43 proseanta dieđáhusain lea registrerejuvvon ahte divššohassii lea muitaluvvon vahága birra, ja 10 proseanttas lea registrerejuvvon ahte divššohassii lea muitaluvvon Norsk Pasientskadeerstatning (Norgga divššohasbuhtadusa) birra.
Stáhta dearvvašvuođageahčču atná buorren go dieđáhusaid lohku lea lassánan. Liikká lea ain nu ahte ollu dieđihangeatnegas dáhpáhusat eai dieđihuvvo. Buori sihkarvuođabarggu eaktun lea rabasvuohta sávakeahtes dáhpáhusaid, vahágiid ja goasiivahágiid birra, ja systemáhtalaš diehtojuohkin. Dát gáibida buori dieđihandábiid, ja ahte jođiheaddjit čalmmustahttet ja ovdánahttet dákkár systemáhtalaš barggu.
Dieđihanguovddáža dieđuid ferte várrogasvuođain dulkot, dan dihte go diehtogieđahallamis sáhttet leat čuožžilan boasttovuođat. Liikká oaivvildit mii ahte dieđáhusat addet ávkkálaš dieđuid, maid sáhttá ávkin atnit kvalitehta buorideami barggus ja spesialistadearvvašvuođabálvalusa geahčus.
|