|
Fágaidrasttildeaddji spesialistabálvalusat gárihuhttinmirkkuid geavaheddjiide válljejuvvui 2006 riikkaviidosaš bearráigeahču fáddán danne go dál lea badjel guokte jagi dassái go bálvalusat organiserejuvvojedje ođđasit ja šadde spesialistabálvalusaid oassin. Ovddasvástideaddji eaiggádiin lea nappo leamaš áigi sihkkarastit dan rašes geavaheaddjejovkui buriid fágaidrasttildeaddji bálvalusaid ja dárkkistit ahte sin pasieantavuoigatvuođat devdojuvvojit.
Mii bearráigeahčaimet njeallje bálvalusdási gárihuhttiid divššus: go pasieanta čujuhuvvo ásahussii ja árvvoštallojuvvo, čielggadeami, divššu ja divššu loahpaheami. Iskkaimet leat go bálvalusat buot dan njealji dásis bealuštahttit ja dolle go 30-beaivvi árvvoštallama áigemeari. Muđui iskkaimet ovttasbargogulahallama eará ásahusaiguin, geavaheddjiid mieldeváikkuheami, bargiid gelbbolašvuođa ja dokumentašuvnnaid oktagaslaš meannudeami (journálačállima).
Gávdnosat duođaštit ahte sii geat fállet fágaidrasttildeaddji spesialistabálvalusaid, fertejit guorahallat doaimmaideaset vai fuomášit guđiid beliid galget buoridit:
- Máŋgga ásahusas eai leat bealuštahtti bálvalusat danne go sis ii leat doarvái gelbbolašvuohta árvvoštallamis, čielggadeamis ja dikšumis. Fuomášeimmet máŋga ášši main ledje váilevaš pasieantadieđut juornálačállimis, ja ahte juornáladieđut eai vurkkoduvvon doarvái sihkkarit.
- Máŋga ásahusa eai sihkkaraste ahte pasieantačujuhusat fágaidrasttildeaddji spesialistadikšui árvvoštallojit fágaidrasttildeaddji árvvoštallanjoavkkus 30-beaivvi áigemeari siskkobealde.
- Leat fuomášan váilevaš rutiinnaid oktiiheivehit bálvalusaid pasieanttaide danne go daid iešguđetge bálvalusaid ovttasbargu, ja fágaidrasttildeaddji spesialistabálvalusaid siskkaldas ovttasbargu, ja suohkaniid dearvvašvuođa- ja sosiálabálvalusaid ovttasbargu ii doaimma doarvái bures.
- Leat fuomášan dilálašvuođaid mat čájehit ahte doaimmat eai systemáhtalaččat stivrejuvvo nu ahte sihkkarastet bealuštahtti bálvalusfálaldaga. Sáhttá leat soaittáhagas registrere go ásahus boasttuvuođaid ja vuorddekeahtes dáhpáhusaid, ja atnet go dan aktiivvalaččat siskkáldas oahppamii ja čađaáigge buorideapmái.
|