|
Fylkamánnit ja fylkka Dearvvašvuođageahčču čađahedje bearráigeahču suohkanlaš sosiála- ja dearvvašvuođabálvalusain ja spesialistabálvalusaid mánáidveajuiduhttinovttadagain. Mii iskkaimet sihkkarastet go bálvalusdoaimmat oktagaslaš heivehuvvon ja ovttastuvvon bálvalusaid mánáide gaskal 0 – 18 jagi geain leat riegádeamis, áigá duođaštuvvon dahje árrat dohppehallan nevrologalaš sivat dahje leat vigiid ožžon nervavuogádahkii. Mii bearráigeahčaimet 40 suohkana ja 21 mánáidveajuiduhttinbálvalusa ovttadaga. Dearvvašvuođageahčču oaivvilda ahte bálvalusat rievddadit hui olu, eai ge leat ovttadássásaččat ulbmiljovkui geat dárbbašit veajuiduhttima. Leat nu stuora erohusat bálvalusain suohkaniid siskkobealde ja suohkaniid gaskal ja spesialistabálvalusain ahte ná ii sáhte joatkit.
Bearrágeahčču fuomášii maid ahte ledje váilevašvuođat dain rutiinnain ja doaibmabijuin mat galget sihkkarastit oktiiheivehuvvon pláneme ja áigges áigái čuovvoleami veajuiduhttinbálvalusain ovttasráđiid mánáin ja váhnemiiguin measta golbma njealjádasoasis suohkaniin. Dávjá váilu obbalaš diehtu dárbbuide ja doaibmabijuide, ja máŋgga áššis leat váhnemat geat geavatlaččat oktiiheivehit bálvalusaid. Muhtomin lei ja muhtomin ii lean fástadoavttir mielde veajuiduhttindoaimmaid plánemis ja evalueremis. Measta bealis suohkaniin ii lean oktiiheivehanovttadat, dahje lei eahpečielggas makkár bargguid ovttadat galggai gozihit. Helpenfálaldagat eai lean oktagaslaččat heivehuvvon ja/ledje marginálat ovtta goalmmádasoasi suohkaniin.
Muhtun mánáidveajuiduhttinbálvalusain eai lean návccat addit nu olu bagadallama go livččii dárbbašlaš, ja guokte goalmmádasoassi sis eai sihkkarastán ahte oktagaslaš plána bargu álggahuvvui. Okta goalmmádasoassi ii doallan áigemeari mii lea 30 beaivvi čujuhusaid árvvoštallat eai ge doallan mearriduvvon dikšunáigemeriid. Rutiinnat rievddadedje das movt suohkanlaš oassebálvalusaide adde ruovttoluotta dieđu bohtosiid ja viidaset doaimmaid rávvemiid birra maŋŋel go vuosttaš geardde čielggadeapmi lei dahkkon. Máŋgga sajis váilo rutiinnat dasa ahte sáddejedje go mánáidveajuiduhttinbálvalusat čálalaš čoahkkáigeassoraportta fástadoaktárii jus earát go son ledje čujuhan mánáid dohko. Muhtun báikkiin gávnnahuvvui ahte spesialistadearvvašvuođabálvalusat eai nákcen addit nu viiddis fálaldaga go nuorra rávisolbmot dárbbašedje, ja maid ovdal ledje ožžon mánáidveajuiduhttinfálaldagas.
|