|
Fátmmasteaddji čálgodoaimmaid joavku Oslo Allaskuvllas lea Stáhta dearvvašvuođageahču ovddas analiseren dieđuid maid fylkkamánnit jahkásaččat sáddejit guovddáš eiseválddiide váiddaáššegieđahallama birra sosiálbálvaluslága olis. Raporta sisttisdoallá váiddaáššiid 5. kapihttala mielde, mat leat áššit ekonomalaš doarjaga hárrái. Diekkár áššit leat jahkásaččat sullii 5000, mii lea ¾ ollislaš váiddaáššelogus sosiálbálvaluslága olis. Eanas oassi dáin áššiin leat suohkaniid doarjaga birra beaivválaš birgejupmái. Suohkaniin lea stuora friddjavuohta mearridit doarjaga, nu guhká go dat lea bealuštahtti dásis. Jagis 2001 ráhkadii stáhta bagadeaddji njuolggadusaid doarjaga sturrodaga birra beaivválaš birgejupmái.
Dán raporttas leat guorahallan movt fylkkamánnit leat gieđahallan váiddaáššiid ruđalaš doarjaga birra. Go vuođđun leat dieđut jagiin 1995 – 2005, de oaidnit movt fylkkamánnit leat gieđahallan váiddaáššiid sihke ovdal ja maŋŋel go stáhtalaš bagadusat ráhkaduvvojedje. Dieđuid leat guorahallan dan vuođul go fylkkamánnit leat riektesihkarvuođa ásahussan ja raporttas analiseret gieđahallon váiddaáššiid logu, gieđahallama bohtosiid, ja man guhká ádjánedje gieđahallamiin. Leat buohtastahttán fylkkamánniid gieđahallamiid ja buohtastahttin lea heivehuvvon dasa man oallugat leat ožžon ruđalaš doarjaga.
Go váiddamearrádusain lea stuora mearkkašupmi ovttaskas olbmuid riektesihkarvuhtii ja eallindillái, de háliida Dearvvašvuođageahčču oččodit áigái buori ja ovttalágán váiddagieđahallama. Dearvvašvuođageahčču háliida maid váiddaáššiid bokte oažžut eanet dieđuid bálvalusaid ja vuostáiváldiid dilálášvuođaid birra. Dán raporttas leat dieđut váiddaáššiid gieđahallama birra, ja lea ávkkálaš olbmuide ja ásahusaide mat doaimmahit bargguid sosiálbálvaluslága mielde. Dat lea maiddái mávssolaš earáide geat barget riektesihkarvuođaáššiiguin.
|