|
Studiet skal utdanne til teneste i kyrkje og kristelege organisasjonar. Det gir grunnleggande innsikt i kristendomskunnskap og kvalifiserar for eit breitt pedagogisk og administrativt arbeid i kyrkjeleg verksemd.
Kort om studieprogrammet:
Studiet er sett saman av ei rekkje emne, og studentane gjer val i høve den profilen dei ønskjer på utdanninga si. Felles er det at alle skal ha minimum 90 studiepoeng innan kristendomskunnskap og minimum 30 studiepoeng innan praktisk-kyrkjelege fag. Studentane kan vidare velje mellom pedagogiske emne, administrative emne og emne relatert til kristeleg ungdomsarbeid.
Kva lærer du:
Studieprogrammet skal mellom anna gi studentane kompetanse til å forstå så vel norsk kultur og tradisjon som det fleirkulturelle samfunnet. Studentane skal få kompetanse i vitskapleg lesing og tolking av bibelske tekstar og innsikt i korleis desse tekstane har påverka kulturuttrykk i den vestlege verda. Det vert lagt vekt på å utvikle kunnskap om religionar og livssyn, møtet mellom desse i samtida, og dei pedagogiske og didaktiske utfordringane dette møtet representerer. Det skal leggjast særleg vekt på spørsmål omkring menneskesyn og etikk. Studentane skal også få teoretisk innføring i sentrale problemstillingar i homiletikk, kommunikasjon, kyrkjekunnskap og kyrkjeleg planarbeid, og få praktisk erfaring frå ulike område av kyrkjeleg verksemd med vekt på barne- og ungdomsarbeid.
Oppbygging og gjennomføring:
Undervisninga er lagt opp som oversynsførelesingar, seminar med førebudde studentinnlegg, basisgruppearbeid og oppgåveskriving med rettleiing.
Døme på eit tilrådd studieløp:
1. semester
- Innføring i KRL
- Bibelen - tekst og tolking
2. semester
- Tru og tradisjon
- Religion, livsyn og formidling
3. semester
- Examen Philisophicum eller valemne
- Valemne på 200-nivå
4. semester
- Sjølvstendig arbeid
- Individ og samfunn eller
- Utanlandsopphald
5. semester
- Formidling og rettleiing
- Praksis i kyrkjeleg verksemd
6. semester
- Kyrkjeleg teneste
- Fritt valgemne eller
- Utanlandsopphald
Aktuelle valemne er Musikk og drama, Ungdomsarbeid og ungdomskultur, ”Da Jesus satte sjelen fri” og utanlandssemester (USA, Kenya/Tanzania, Australia) Det er også mogleg å få godkjent andre relevante emne.
Vegen vidare – jobb og studium:
Studiet kvalifiserer til kyrkjeleg teneste som menighetspedagog, ungdomsarbeidar eller dåpslærar og til teneste i kristelege organisasjonar. Studiet kvalifiserer også for opptak til Mastergradsutdanning for kateketar. Dessutan kan studentar, ved målretta emneval, danne bachelor-grunnlag for cand. theol-studier/ mastergradstudier for prestar.
Utanlandsopphald:
Det blir lagt til rette for at studentar kan gjennomføre delar av andre eller tredje studieåret ved samarbeidande utdanningsinstitusjonar i utlandet. HVO har
avtalar med følgjande utdanningsinstitusjonar om studentutveksling:
Augsburg College, Minnesota, USA
Griffith University, Australia
Kenya/ Tanzania
|
