|
Tek du ei 5-årig lærarutdanning på mastergradsnivå, får du lektorkompetanse som gjer at du stiller sterkare på arbeidsmarknaden. Les om mastergrad i spesialpedagogikk, mastergrad i grunnskulens norskfag og mastergrad i grunnskulens matematikkfag,
Den fireårige allmennlærarutdanninga kvalifiserer til å bli allmennlærar med adjunktkompetanse. Dei to fyrste åra av utdanninga er fylt opp av sentrale fag, som er obligatoriske:
- matematikk (30 stp)
- norsk (30 stp)
- pedagogikk (30 stp)
- KRL (20 stp)
- GLSM (grunnleggande lese-, skrive- og matematikopplæring) (10 stp)
Dei to siste åra kan du bruke fagvala til å byggje opp din eigen profil og kompetanse som lærar. Høgskulen i Volda tilbyd eit breitt utval av ulike skulefag. I tillegg har vi frå i år også studium på mastergradsnivå i sentrale skulefag. Gjer du dei rette fagvala tredje året i allmennlærarutdanninga, kan det fjerde året bli det første året av ei toårig masterutdanning. Med eitt år påbygging på den fireårige allmennlærarutdanninga vil du då få lektorkompetanse.
Tek du ei 5-årig lærarutdanning på mastergradsnivå, får du lektorkompetanse som gjer at du stiller sterkare på arbeidsmarknaden. Lektorkompetansen gir lønsmessig kompensasjon som kjem deg til gode gjennom heile arbeidskarrieren.
Masterstudia er profesjonsretta og knytt til dei faglege, didaktiske og pedagogiske utfordringane du møter som lærar og pedagog i grunnutdanninga. Vi tilbyd desse profesjonsretta masterløypene:
Mastergrad i spesialpedagogikk [120 stp]
Studiet i yrkesretta spesialpedagogikk skal førebu studentane til å leggje grunnlaget for og utvikle ein inkluderande barnehage og skule.
Ei særleg oppgåve i dette er å ta vare på interessene til barn og unge med spesielle behov for hjelp og støtte. Dette har stilt barnehage og skule overfor den utfordringa det er å ta vare på og utfordre alle barn og unge, ikkje berre dei som har behov for spesialundervisning. Her har førskulelærarar og lærarar med spesialpedagogisk kompetanse ei sentral oppgåve.
Det er stort behov for spesialpedagogisk kompetanse i barnehagen, i grunnskulen og i den vidaregåande skulen. Høgskulen i Volda tilbyd toårig masterstudium i spesialpedagogikk, og dei tre første åra av allmennlærarutdanninga kvalifiserer for opptak. Studiet er bygd opp av seks emne på 15 studiepoeng kvar og ei masteroppgåve på 30 studiepoeng. Kvart emne vert lagt over eitt semester med fem samlingar over to dagar i Volda. Studiet kan gjennomførast på deltid eller på heiltid.
Opptak
Søkjarar til Mastergraden i spesialpedagogikk vert tatt opp på grunnlag av fullførtgrunnutdanning ved universitet eller høgskule av minimum tre års omfang, dvs. 180 studiepoeng, innanfor følgjande utdanningsvegar:
- allmennlærarutdanning
- førskulelærarutdanning
- faglærar med praktisk- pedagogisk utdanning
Søkjarar med fullført utdanning som barnevernspedagog, vernepleiar eller anna 3-årig relevant profesjonsutdanning, kan takast opp etter individuell vurdering.
Mastergrad i grunnskulens norskfag [120 stp]
I samarbeid med Høgskolen i Sør-Trøndelag tilbyd Høgskulen i Volda masterstudium i grunnskulens norskfag.
Internasjonale undersøkingar og dei nasjonale prøvene har ført til auka merksemd på korleis vi gjennomfører lese- og skriveopplæring i skulen, og kompetanse på desse felta er etterspurt i arbeidsmarknaden. Mastergrad i grunnskulens norskfag gjev kompetanse på desse og andre viktige felt, som norskfaget i den fleirkulturelle skulen, lese- og skrivevanskar og bruk av IKT. Høgskulen i Volda tilbyd to emne på 30 studiepoeng kvar som kan inngå som det fjerde året i allmennlærarutdanninga. For å ta det andre året av masterstudiet må det søkjast opptak ved Høgskolen i Sør-Trøndelag, og Høgskulen i Volda kan tilby rettleiing knytt til masteroppgåva.
Opptak
Studentar som skal søkje opptak til master i grunnskulens norskfag, må ha fullført dei tre første åra av allmennlærarutdanninga, der 60 studiepoeng i norsk inngår. Det vil seie at studentane må velje Norsk 2 som eitt av to fag tredje året i allmennlærarutdanninga.
Mastergrad i grunnskulens matematikkfag [120 stp]
I samarbeid med Høgskolen i Sør-Trøndelag planlegg Høgskulen i Volda masterstudium i grunnskulens matematikkfag.
Undersøkingar viser at norske elevar ikkje har god nok matematikkunnskap. I tida framover vil det difor bli auka etterspørsel etter lærarar som har kompetanse i matematikk ut over det som er lagt inn i den obligatoriske delen av allmennlærarutdanninga. Mastergrad i grunnskulens matematikkfag imøtekjem dette behovet, og gjev ei fagleg fordjuping i dei didaktiske utfordringane i grunnskulens matematikkfag. Lærarar som tek denne utdanninga, vil vere svært ettertrakta arbeidskraft i den norske skulen. Høgskulen i Volda vil tilby to emne på 30 studiepoeng kvar som kan inngå som det fjerde året i allmennlærarutdanninga. For å fullføre masterstudiet, å det søkjast opptak ved Høgskolen i Sør-Trøndelag.
Opptak
Studentar som skal søkje opptak til master i grunnskulens matematikkfag, må fullføre dei tre første åra av allmennlærarutdanninga, der 60 studiepoeng i matematikk inngår. Det vil seie at studentane må velje Matematikk 2 som eitt av to fag tredje året i allmennlærarutdanninga. Planlagt start hausten 2006.
Meir informasjon om studietilboda og mastergradane våre finn du på www.hivolda.no/studietilbod.
Sjå brosjyre i pdf-format her.
HVO tek atterhald om endringar.
Publisert: 15.04.2005 10:15 av Per Arne Brandal
|
