ÁRDNA – universitehta sámi kulturviessu
Sámi dutkamiid guovddážis lea ovddasvástádus Árdnii – universitehta sámi kulturvissui. Árdna mearkkaša báikki gos lea divrras dávvir. Árdna ja Juho-Niillasa goahti leat guovddážis sámi kultureanadagas universitehtaguovllus. Dasa lassin leat Sámi dutkamiid guovddáža ođđa kánttorlanjat dán guokte erenoamáš vistti guoras.

Viessu lea hábmejuvvon dego mánnobealli, ja lea lunddolaččat heivehuvvon Labyrintta ja Juho-Niillasa goađi báldii. Ártna guora manná bálggis mii vuolgá Hálddahusdálus ja manná gitta ođđa Teorifágagárdima Viessu 2:i, gos Sámi dutkamiid guovddáža kantuvrrat leat. Árdna lea kultureanadagas mii álgá Romssasullo alde, manná vulos Juho-Niillasa goađi ja Labyrintta guvlui, ja viidáset báikái gos sáhttá várdát nuppe beallái nuori - Sálašvággái iežas sámi historjjáin, ja Sálašoaivái.

Ártnas lea stuora latnja maid sáhttá geavahit deaivvadanbáikin ja čájáhusbáikin. Dán lanjas lea bázzi ”Jaskadit jorrá jurdda” maid Ánddir-Ivvár Ivvár - Iver Jåks - lea hábmen. Kárášjohkalaš duojár Jon Ole Andersen lea leamaš guovddážis viesu hábmemis.

Árdna og Juho-Niillasa goahti leat čábbat ja divrasat, ja daid ferte áktejumiin geavahit ja gieđahallat. Árdna lea erenoamáš deaivvadanbáiki universitehtas mii heive čoahkkimiidda, unnit semináraide ja ovddastemiide. Viesu ii sáhte geavahit feastabáikin.

Gulahallandieđut, galledeapmi, luoikkaheapmi ja láigoheapmi

Váldde oktavuođa: Sámi dutkamiid guovddážis lea ovddasvástádus ráhkadit plána Ártna ja Juho-Niillasa goađi geavaheamis. Buot galledemiid, luoikkahemiid ja láigohemiid oktavuođas lea deaŧalaš ahte buori áiggis ovdalgihtii váldá oktavuođa Sámi dutkamiid guovddážiin iskan dihte leago Árdna guoros dalle go hálida geavahit viesu.

Jus sávvojuvvon galledan-, luoikkahan- dahje láigohanáigi lea oktanaga go deaŧalaš lágideamit Sámi dutkamiid guovddáža dahje eará universitehta ovttadagaid olis, de vuoruhuvvojit dát lágideamit eará dárbbuid ovdii. Seammá gusto jus olgguldas geavaheaddjit leat várren Ártna ja várrejupmi lea oktanaga fáhkka čuožžilan deaŧalaš lágidemiiguin universitehta olis.

Jus hálidat galledit Ártna, de fertet váldit oktavuođa Sámi dutkamiid guovddážiin čuovvovaš e-boastta bokte: ardna@sami.uit.no dahje čuojahit tlf. 77645535/77645534.

Muđui gustojit čuovvovaš njuolggadusat go Ártna luoikkaha:

Luoikkaheapmi: Beaivet bargoáiggis gaskal dii 0900 ja 1600 sáhttet Romssa universitehta ovttadagat luoikkahit Ártna. Árdna ii leat heivehuvvon geavehemiide mat gáibidit ovdamearkka dihte power point ja overhead/čájehanmašiinna. Jus Romssa universitehta ovttadagat galget geavahit viesu maŋŋel bargoáiggi čoahkkimiidda dahje sullasaččaide, de galget čuovvut daid dábálaš njuolggadusaid mat gusket universitehta visttiid geavaheapmái.

Láigoheapmi: Universitehta lea ráhkadeame ođđa njuolggadusaid universitehta lanjaid láigoheami hárrái. Dassážii go dát njuolggadusat leat gárvásat, de sáhttet olgguldas geavaheaddjit main lea fágalaš čatnaseapmi Romssa universitehtii váldit oktavuođa Sámi dutkamiid guovddážiin čuovvovaš e-boastta bokte: ardna@sami.uit.no dahje čuojahit tlf. 77645535/77645534 lagat dieđuid oažžumii ja vejolaččat šiehtadit Ártna geavahit.

Čoavdda: Čoavdaga oažžu Sámi dutkamiid guovddážis lanjas 2222/2219. Gáibiduvvo buhtadus jus viesu dávvirat/diŋggat billahuvvojit luoikkaheames/láigoheames.

Gievkkana geavaheapmi: Gievkkanis leat gievkkandiŋggat. Jus gievkkana áigu geavahit, de dan ferte ovdalgihtii soahpat.

Čájáhusat: Árdna lea maid heivvolaš čájáhusbáiki earret eará govvadáidagii. Go Árdna geavahuvvo čájáhusbáikin, de fertet gáržžidit eará geavaheami.