Joho Niillas goahti
1997 geasi huksehii Romssa universitehta goađi universitehtaguvlui. Goahti govvida Romssa universitehta lagas oktavuođa sámi servodagain.

Gii sáhttá luoikkahit goađi?
Sámi dutkamiid guovddáš luoiká goađi daidda geat hálidit. Ii dárbbaš láiggu máksit go luoikkaha goađi. Muhtomin soitet leat máŋgasat geat hálidivčče luoikkahit goađi, danin berret buori áiggis váldit oktavuođa Sámi dutkamiid guovddážiin jus áiggut luoikkahit goađi. Buohkat geat hálidit sáhttet luoikkahit goađi, muhto Sámi dutkamiid guovddážis lea vuosttašriekti geavahit goađi.

Goahti lea deaivvadanbáikin sámiide Romssa universitehtas, muhto maiddái earát universitehtas sáhttet atnit dan. Goahti ovddasta oasáža sámi kultuvrras Norggas, ja galgá dan mielde geavahuvvot. Ovdamearkka dihte eai galgga goađis leat doalut gos guossohuvvo alkoholajugastat.

Jus hálidat luoikkahit goađi, de sáddes maila dán čujuhussii: per.k.heatta@sami.uit.no dahje riŋges 77 64 55 36.

Goađi huksen
Geassemánus 1997:s huksegohte goađi. Sálašvággi lei ruoŧabeal boazosápmelaččaid geasseorohat gitta 1939 rádjái ja dan dihte lei lunddolaš ahte ruoŧabeal sápmelaččat huksejedje goađi ruoŧasámi goahtemálle mielde.

Sámi dutkamiid guovddáš bálkáhii Nils Tommas Parfa, Nils Henrik Gunnare, Isak Påve ja Lasse Rassa hukset goađi. Sii huksegohte goađi dakka maŋŋel go muohta suttai Romssas geassemánus 1997.

Álggos fertejedje čohkket soahkemuoraid ja dan dahke Sálašvákkis. Seammás loggo muhtumat Ráissas bessiid mainna galge besset dáhki ja seinniid. Go dat lei dahkkon, de sáhtte huksegoahtit goađi.

Álggos ceggejedje goahteráhkadusa dábálaš materiálaiguin. Árbevirolaččat ceggejuvvo goahteráhkadus soahkemuoraiguin, muhto go galggai leat nu stuora saddjás goahti, de ii lean vejolaš dan dahkat. Go álgoráhkadusa ledje ceggen, skoađastedje dáhki ja seinniid soahkemuoraiguin. Goađi siste oaidná soahkemuoraiguin skoađastuvvon seinniid ja dáhki. Soahkemuoraid nala bidje dasto bessiid bálddabálddalaga. Go besse goađi de álgá vuollin ja joatká bajásguvlui, seammaládje go dábálaš dáhkkebáhpira bidjá. Oktiibuot manai sullii 100m2 beassi besset goađi. Beassi nala fas borde lavnnjiid maid universitehtaguovllus ledje loggon.

Geahča govaid goađi huksemis:

• Govat goađi huksemis 1
• Govat goađi huksemis 2

Universitetsdirektevra Harald Overvaag oaččui dan stuora gutni almmolaččat rahpat goađi skábmamánu 28. beaivvi 1997.

Geahča govaid goađi rahpamis:

• Govat goađi rahpamis 1
• Govat goađi rahpamis 2