Ovttasbargu gaskal URACCAN ja Romssa universitehta

Romssa universitehta ja URACCAN-universitehta Nicaraguas ovttasbargaba NUFU-ruhtaduvvon prošeavttain "Cultural revitalization, environment and the natural resources of the indigenous peoples of the Atlantic coast of Nicaragua." Dát ovttasbargoprošeakta lei duogážin dasa ahte Romssa universitehta galledii URACCAN-universitehta. Lea viđát jahki go prográmma lea jođus, ja dál lea čađahuvvon vuosttaš oassi. NUFU doarju prográmma olggos jagi 2008. Prográmma čalmmustahttá Nicagarua eamiálbmogiid dili Atlántarittus. Prográmma deaŧalaš ulbmilat leat gelbbolašvuođahuksen (capacity building) ja URACCAN akademalaš stáhtusa nannen. Geassemánus 2004 ledje sullii 50 olbmo URACCAN-universitehtas (studeanttat ja bargit) geat ledje ožžon doarjaga prográmmas, ja 30 prošeavtta ledje gárvvistuvvon dahje gárvvistuvvome. Vuosttaš oasis leaba professor Svein Jentoft ja vuosttašamanuensa Harald Gaski leamas prošeaktajođiheaddjit, prošeavtta nuppi oasi jođiha Svein Jentoft. Dasa lassin lea Jens Revold mielde prošeaktahálddašeamis. Svein Jentoft čállán fágačálus Nicaragua eamiálbmogiid, ressursaid ja vuoigatvuođaid birra gávnnat dákko PDF-filan dahje neahttasiidun mas leat govat.

URACCAN birra

URACCAN-universitehta rahppojuvvui jagis 1995. Báikkálašservodaga iešguđet dárbbut leat guovddážis universitehta bargguin. Deaŧalaš fágasuorggit leat sosiologiija, mineráladoaimmaid oahput, ingenevra-, guolástus- ja eanandoallooahput, ja giella- ja guovttegielalašvuođaoahput, árbevirolaš dálkun, nissondutkamat ja kultuvrraid gasksaš gulahallan.

URACCAN deattuha ahte oahppoplánat galget váldit vuhtii ahte dán guovllu olbmuin ii leat árbevierru váldit alit oahpu, ja ahte universitehta lea oassin kultuvrralaš ealáskahttimis. Danin lea dárbu lahttudit iešguđet oaidninsajiid ja máhttoárbevieruid dutkamii ja oahpahussii.  

URACCAN-universitehta lágida kurssaid báikkálašservodagaid jođiheddjiide máŋgga suorggis, earret eará eananhálddašeamis, juridihkas, vieruiduvvon vuogatvuođain ja eamiálbmotvuoigatvuođain. Dilemma dán barggus lea ahte báikkálašservodat čuoččuha ahte olbmot oahpahuvvojit eret sin iežaset servodagain. Danin lea URACCAN-universitehta filosofiijan ahte galgá leat lagas ovttasbargu gaskal báikkálašservodaga ja universitehta. Eamiálbmotstudeanttaide ferte leat vejolaš álgit universitehtii, universitehta ferte leat sadji gos olbmot sáhttet deaivvadit, ja universitehta ferte oažžut luohttámuša olbmuin.

URACCAN-universitehtas leat universitehtaguovllut dáin báikkiin: Managua (oktiiheivehankantuvra), Puerto Cabezas, Siuna, Bluefields ja Nueva Guinea..