Dei er einige i at bustader er det viktigaste i studentpolitikken.
Studentkandidatane til Bergen bystyre er berre ikkje samde
om metoden for å få dei.
 |
BERGEN I RYGGEN. Desse tre studentane vil vere
med på å bestemme i ditt Bergen til hausten. F.v.
Julie S. Andersland (Venstre), Tina Åsgård (SV)
og Pål H. Thorsen (AP) står på kummulerte plassar
til bystyret.
|
– Vi kan ikkje lenger utsetje å bygge bustadar, og vi
må bygge stort for å få nok hyblar, seier AP-politikar
Pål H. Thorsen. Gjennom heilsides annonser i Studvest
har AUF lova bustadar for 500 studentar på Nygårdstangen.
Eit 18-etasjers tårn – noko som blir det høgste i Bergen
– skal løyse ein del av bustadmangelen i bykjernen. Men
i programmet til moderparti AP er ikkje tårnet nemnt med
eit ord, til tross for at det er AP som skal utføre lovnaden
for AUF. Uproblematisk, seier Thorsen:
– Tårnet vart foreslått etter at AP-programmet vart vedtatt.
Dei andre partia følgjer opp lovnadane. Julie S. Andersland,
2.kandidat frå Venstre er relativt trygg på ein plass
i bystyret. Saman med Høgre vil ho bygge bustadar ved
Store Lungegårdsvatnet. Aller helst ser ho at fleire tomter
vert utbetra.
- Det er mange rivningsklare hus i Bergen. Venstre ynskjer
at studentsamskipnaden skal få feste slike tomter for
ei krone, og bygge billige bustadar.
Bygging høgt oppe
Undersøkinga Studvest har gjort om partias toppsaker,
viser at bustadbygging så desidert er hovudsak ovanfor
studentar. Heilt til topps når ikkje bygginga; ingen av
partia svarer at det er sjølve hovudsaka.
- Nei, men bustadpolitikken vår er noko av det viktigaste.
Få bustadar er sjølvsagt eit utslag av marknadspolitikken
som har blitt ført. SV ynskjer å regulere den private
utleigemarknaden, seier Tina Åsgård. Ho er 3. kandidat,
og ein av truleg tre studentar som vil representere SV
i bystyret. SV vil bygge 500 bustadar for studentar og
andre grupper.
Leik med tal?
- Høgre seier 800 nye bustadar, AP 600 og SV 500. Samstundes
med at Bergen kommune har eit voldsomt underskot, framstår
ikkje dette meir som leik med tal enn konkrete planar?
- Eg trur at med framleis AP-styre vil vi sjå sosial bustadbygging.
Men det forutset at AP møter press frå dei andre partia,
seier Thorsen. KrF ynskjer, til liks med Venstre, ein
kommune gavmild med tomter.
- Billige studenthyblar er viktig. Bergen kommune bør
stille med gratis tomter, seier Hermund Haaland i KrF.
Utan at han har konkrete forslag til kva tomter det skal
vere.
Studentar i bystyret
Sju studentar kjem truleg til å sitje i bystyret i neste
periode. I følgje tal Studvest har bearbeida frå Opinion
og Bergens Tidende, får SV tre plassar, Høgre to, og Venstre
og AP ein kvar. I bystyret sit det til saman 67 representantar.
Dei andre partia har og studentar høgt oppe som kan konkurrere
om plassane. Av Bergens over 25.000 studentar, kan berre
8.700 av dei stemme her.
- Kan sju studentar bli ein maktfaktor i bystyret?
- Det er viktig at vi kan samle oss som ein korreks mot
morpartiet. Det kan bli avgjerande i det vi får oppleve
i bystyret til hausten, særleg om høgrepartiene får styre,
meiner Thorsen. Medan Åsgård trur mindre på ei studentfylking
på rådhuset.
- Kanskje, men vi har veldig ulike interesser i dei
ulike partia. Ein studentrepresentant frå Høgre var og
invitert til dette intervjuet, men unnlot å kome.
