FYLLA HAR SKYLDA. Årets fyrste utepils vert nytt eit steinkast frå auditoriet. Sosiologistudentane Nina Krogstad (f.v.), Andreas Røssevold, Carina Nilsen og Andreas Grimsæth går på Bergens fuktigaste fag.

Landets verste drankarar

UiB-studentar frekventerer byen flittigast i landet. Og sosiologistudentane er dei verste.

Tekst: ØYVIND LEFDAL EIDSVIK / oyvind@studvest.no
Foto: ANNIKEN C. MOHR / anniken@studvest.no

For når tala frå stud.mag, den store studentundersøkinga gjort av regionavisene, skal oppsummerast, er rankinga klar: Åtte fag ved Universitetet i Bergen (UiB) er blant dei tretti mestdrikkande faga i landet.

Ved ingen andre lærestadar oppbyr studentane same innsatsvilje til å gå på bar, disko, restaurant og kafé, som er kriteria TNS Gallup har nytta for å lage statistikken.

Dei mest sosiale er, nær sagt sjølvsagt, fyrsteårsstudentane på sosiologi. Dei må likevel sjå seg slått av både journalistspirar i Oslo, komande arkitektar og nasjonens framtidige håp, eksportmarknadsførarane frå BI, i den nasjonale rankinga.

KULTURELL FORSTÅING
Filosofistudentane er Bergens nest mest utgåande, sjølv om undersøkinga ikkje nemner eit ord om det er snakk om sorgdrukning eller ein naturleg konsekvens av tunge diskusjonar. Andre fag ved SV- og HF-fakulteta dominerer Bergens ti-på-topp.

Studentane ved interkulturell forståelse ved Norsk lærarakademi (NLA) er òg langt framme, medan vernepleiarlinja ved Høgskulen i Bergen sikrar HiB ein fin 11. plass i Bergen.

Og berre for å gjere klisjeen komplett: Jammen er ikkje filosofi- og sosiologistudentane dei som går mest på teater, kino og kunstutstillingar i Bergen òg.

ÅRETS FYRSTE UTEPILS
– Fy fader, dette var godt, seier Andreas Grimsæth. Dei tre andre rundt bordet nikkar nøgd. Dette er årets fyrste utepils for sosiologistudentane.

– Vi er nok ganske mykje ute, men det er det fleire fag som er. Eg er nok ute kvar dag, på kafé, pub eller andre plassar, seier Nina Krogstad.

– No kjem eg til å sitte på lesesalen og tenkje på øl resten av dagen, trur Nina. Ho er likevel beroliga av at all frekventering av byens utestadar trygt kan kallast feltstudier.

FØRTITRE TIMAR I VEKA
Ikkje alle samanhengar er like overraskande. For filosofistudentar travelt opptatt med museumsbesøk og pilsing, må studietida vike. Faktisk er dei nest sløvast av faga som er undersøkt i Bergen.

Mest tid på studiar bruker studentane ved økonomi og administrasjonsfag på HiB, med heile 43 timar i veka. Noko som tilsvarar ei riktig god arbeidsveke. Jusstudentane kjem ikkje langt etter. Medan interkulturell forståelse ved NLA er det slappaste faget i Bergen, med kring 20-timers studieveke. Likevel gjer dei det skarpt i høve til landets sløvaste: Ex.phil-studentane ved Høgskolen i Lillehammer jobbar 13 timar kvar veke.

NØGDE PÅ DIAKONISSEN
Radiografane ved Høgskulen er, som Studvest meldte i førre veke, Bergens mest misnøgde med studiet sitt. Mest nøgde er derimot sjukepleiarstudentane ved Diakonissehjemmet på Haraldsplass. Dei anbefalar skulen sin varmast av alle i landet.

For UiB er ikkje stud.mag-undersøkinga særleg positiv lesing. Studia ved Universitetet utmerkar seg ikkje verken på fagleg kvalitet, på administrasjonens service eller pedagogisk kvalitet.

– Undersøkinga er ikkje rosenraud lesing for vår del. Vi må ta det til etterretning, seier Mette Myrmel Torrissen, utdanningsdirektør ved UiB.

SLAPP START
På landsbasis er studentane ved Høgskolen på Lillehammer dei mest nøgde i landet. Av universiteta er det i Tromsø best likt. Høgskolen i Bergen er i følgje undersøkinga den nest verste skulen i landet. Fyrstesemesterstudentane bruker i følgje Aftenposten mindre tid på studiane no enn for fire år sidan. Dei fleste fag har gått ned, slik som odontologi, som på landsbasis no jobbar to timar mindre i veka enn i 2000.

– Dette er overraskande, og slett ikkje i tråd med intensjonane til Kvalitetsreformen, seier Per Kristen Mydske, styrar ved Institutt for statsvitskap ved Universitetet i Oslo, til Aftenposten.

Derimot er ikkje deltidsjobbinga endra, slik mange trudde før reformen. Studentane jobbar like mykje som før.

Studvest
følger saken:

Kvalitets-
reformen

Siste artikkel:
20. august 2003
Antall artikler: 36

Lånekassen

Siste artikkel:
11. september 2002
Antall artikler: 11