SiB ut på anbod
|
 |
MCSIB? – Hadde vore
digg, seier Nikolai Høgset, Thomas Høgda,
Anders Ellingsen og Andreas Nilsen om tanken på
ei McDonald’s-kantine på folkehøgskulen
deira i Sunnhordland. Men både det og ein eventuell
McSiB ligg nok langt framme i tid.
|
McDonald’s-kantiner på Nygårdshøyden
er førebels berre eit uverkeleg framtidsscenario. Men
jaget etter effektivitet får no Studentsamskipnaden
i Bergen (SiB) til å leggja ein del av verksemda si
ut på anbod.
Tekst: FREDRIK H. BJØRGO / fredrik@studvest.no
– Eg trur konkurranseutsetting vil visa at det vert
produsert fleire tenester for den same prisen, seier styreleiar
i SiB Eivind Kildal.
I løpet av året skal både parkeringsforvaltinga
og drifta av nokre studentbustadar ut på anbod. Om dessa
prosjekta vert vellykka og SiB klarer å spara pengar,
fylgjer sannsynlegvis fleire tenester etter.
DÅRLEGE ERFARINGAR
Erfaringar frå andre samskipnadar kan tyda på
at konkurranseutsetting ikkje gjev det billigaste alternativet.
– Me sette ut IT-tenestene våre til private,
men det vart både dyrare og dårlegare. Me vurderte
å gjera det same med både løningskontoret
og fleire delar av bustaddrifta, men fann ut at me ikkje ville
spara noko på det, fortel viseadministrerande direktør
i Studentsamskipnaden i Oslo (SiO) Trond Bakke. Likevel er
SiO no i ferd med å legga reinhaldet i bustaddivisjonen
ut på anbod.
I Trondheim har utrekningar vist det same resultatet som
i Oslo.
– Innkjøpte tenester ville verta dyrare enn
våre eigne, blant anna på grunn av at me då
ikkje ville fått frådrag for inngåande meirverdiavgift,
fortel viseadministrerande direktør Else Naustdal i
Studentsamskipnaden i Trondheim.
For samskipnadene sitt lovfesta momsfritak gjeld ikkje når
tenestene vert kjøpt inn utanfrå eller sett ut
på anbod.
SiB-styreleiar Kildal meiner at den manglande suksessen i
andre samskipnadar skyldast at dei har kjøpt inn avgrensa
spesialtenester. SiB set i staden heile drifta av einskilde
bustadanlegg ut på anbod.
UROA FOR TILSETTE
Studentrepresentant i SiB-styret, Jette Christensen, er prinsipielt
negativ til konkurranseutsetting.
– Sjølv om me må gjera alt så billig
som mogleg for å unngå husleigeauking, så
tykkjer eg at omsynet til dei tilsette òg er viktig.
Konkurranseutsetting gjer situasjonen deira alt for usikker,
meiner ho.
Leiar av velferdsstyret, Guro Haraldsen Fosse, meiner at
SiB sine kjernetenester som bustad, barnehage og helse under
ingen omstende må få gå ut på anbod.
UMOGLEG KAFE
– Kvifor legg de ikkje kantina på Studentsenteret
ut på anbod, når SiB faktisk driv henne med underskot?
– Visse kafear og kantiner er det umogleg å tena
pengar om ein skal oppretthalda dagens standard. Viss nokon
skal driva kantina på Studentsenteret med overskot,
så må anten tilbodet verta dårlegare eller
tilhøva for dei tilsette verta så dårlege
at det vil strida mot SiB sin etikk, meiner styreleiar Kildal.
Eigentleg er det ingenting som hindrar SiB og Universitetet
i å gje McDonald's eller ei anna burgersjappe plass
i Studentsenteret, om dei skulle vise seg å ha det billigaste
anbodet i ein eventuell anbodskonkurranse.
Men det er ingenting som tydar på at fleirtalet av
dagens studentpolitikarar vil gå så langt i jaget
etter effektivitet.
STRATEGI
– SiB sitt mål er ikkje å få størst
mogleg overskot, men å gje eit godt tilbod til studentane.
Men me skal vera konkurransedyktige. Om 7-Eleven er billigare
enn SiB, så har me gjort noko gale, meiner Kildal.
SiB har utarbeida ein strategiplan der ein tek høgd
for at støttetenester som lønsutbetaling og
sentralbord kan verta konkurranseutsette om styret ynskjer
det. Men kjernetenestene meiner dei ikkje bør konkurranseutsettast.
– SiB og SiB-styret skal ikkje berre vera eit innkjøpsorgan,
seier styreleiar.
Bustaddrifta først ut
Drifta av ein eller fleire av SiB sine studentbustadar
blir sannsynlegvis sett ut på anbod før jul.
I tillegg innfører SiB parkeringsavgifter.
– Styret ville sjå om private kan driva studentbustadar
meir effektivt enn SiB. Ved at SiB sin bustaddivisjon òg
legg inn anbod vil me få testa ut kor effektive SiB
er, fortel styreleiar Eivind Kildal i SiB.
Det er forvaltinga, reinhaldet og vedlikehaldet av ein eller
fleire studentbustadar som skal ut på anbod. Bustadanlegga
på Løvstakksida, altså Løbergsvegen,
Damsgårdsvegen, Gyldenpris og Frydenbø er mest
aktuelle.
Kva for nokre bustadar som skal ut på anbod og andre
detaljer vert avgjort i løpet av hausten, slik at anbodskonkurransen
kan byrja før jul. Det vil dreia seg om treårskontraktar.
VIL HA TAL
Knut Wilhelmsen er ein av dei tilsette sine representantar
i SiB-styret. Han er ikkje så oppglødd over styret
sine anbodsplanar.
– Me tilsette er òg opptekne av at ting skal
gjerast billegast mogleg. Men me liker ikkje at styret set
arbeidsplassar på spel utan at ein har klart å
framskaffa tal som viser at det faktisk er noko å spara
på å setta delar av drifta ut på anbod,
seier han.
SMART P-AVTALE
Forvaltninga av parkeringsplassane rundt studentbustadane
vert i desse dagar òg sett ut til selskapet Center
Park AS.
– Dei får inntektene av parkeringsgebyra, altså
bøtene for feilparkering, medan SiB får dei regulære
parkeringsinntektene, altså det ein betaler for å
stå parkert. Dermed får me ordna opp i parkeringstilhøva
utan at me treng å betala for det. Tvert imot gjev det
oss ei lita inntekt, fortel SiB sin administrerande direktør
Egil Pedersen.
Styreleiar Kildal poengterer at parkeringsutgiftene no vert
meir rettferdig fordelt.
– Før vart dei fordelt på alle SiB sine
bebuarar. No må derimot berre det mindretalet som har
bil betala, seier han.
Kildal vonar at prisane vert relativt beskjedne, som i Oslo:
Kanskje omlag ein tusenlapp i året og ein liten hundrelapp
for eit døgn.
|
