– «NM i utdanning» er berre tull

BT-bilaget Stud.mag. gir UiB dårlege skotsmål. – Stud.mag. gir eit forvrengt bilete av kvaliteten på tilbodet, seier Øyvind Jakobsson i NSU. Han får støtte av UiB-rektoren.

Tekst: VIDAR GUDVANGEN / vidar@studvest.no
Foto: PER CHRISTIAN SOLHEIM / per@studvest.no

	REAGERER: – Stud.mag. skapar eit bilete av UiB som ikkje er riktig, meiner Øyvind Jakobsson i NSU.

– UiB har fått eit stempel som ikkje er riktig, hevdar Øyvind Jakobsson i Norsk Studentunion (NSU) i Bergen. Han reagerer på at det i bilaget ikkje kjem tydeleg fram at det berre er ferske studentar som er spurde. Han er heller ikkje imponert over måten data er samla inn.

Stud.mag. tek mål av seg å rangere ulike fag og lærestader i det dei kallar «NM i utdanning». Studentmagasinet kjem som eit årleg bilag i Bergens Tidende (BT), Aftenposten og Adresseavisa i forkant av søkinga til Samordna opptak. I år kjem informatikk og nordisk litteratur ved Universitet i Bergen (UiB) særleg dårleg ut. No reagerer NSU på måten undersøkinga er framstilt.

– Stud.mag. tek føre seg ein del reelle problemstillingar, men dei er omtala på feil måte. Folk vil få eit forvrengt bilete av kva tilbod som blir gitt, og kvaliteten på dei. Folk bruker stud.mag. som eit viktig reiskap i val av studie, trur Jakobsson.

– Viss stud.mag. skal gje råd til studentar, bør dei køyre komparative samanlikningar av ulike studie. Dei bør òg skilje mellom høgskular og universitet, dei er strukturelt for ulike til å kunne setjast opp mot kvarandre, meiner Jakobsson.

–TEK DET TIL ETTERRETNING
– Det er viktig at det kjem klart fram kven undersøkinga omfattar, seier rektor ved UiB, Kirsti Koch Christensen. Ho hadde gjerne sett at universiteta hadde vore samanlikna for seg, men legg til at det for profesjonsutdanningane kan vere greitt å bli samanlikna med høgskulane.

– Det er berre tull å kalle Stud.mag. for NM i utdanning, meiner rektoren som ikkje er overraska over at UiB kjem dårleg ut.

– Universiteta i Oslo og Bergen kjem tradisjonelt dårleg ut i Stud.mag. Likevel opplevde vi god auke i talet på søkjarar i fjor. Koch Christensen har meir tillit til UiB sitt eige Studentbarometer som omfattar alle kull, men understrekar at dei ønskjer å kartleggje kvifor ferske studentar er så misnøgde med dei administrative tenestene ved UiB.

LITE IMPONERT
Der er Norsk institutt for forsking og utdanning (NIFU) som er ansvarleg for undersøkinga bak Stud.mag. Elisabeth Hovdhaugen har vore prosjektleiar for NIFU og koordinert målinga som er utført av TNS Gallup. Heller ikkje ho er begeistra for den journalistiske handsaminga av materialet.

– Eg er kritisk til måten undersøkinga vert framstilt. Det er for stort fokus på det negative. Generelt er jo norske studentar nøgde, understrekar Hovdhaugen. Ho fortel vidare at ho leverte ei lang skriftleg forklaring til stud.mag-redaksjonen, der det tydeleg vart understreka at målinga berre omfatta førsteårsstudentar.

– Etter journalistisk omarbeiding var dette ikkje lenger like tydeleg, vedgår ho.

Ho forklarar at Stud.mag. berre omfattar førsteårsstudentar, fordi undersøkinga er retta mot avgangselevar i den vidaregåande skulen.

HAR DEKNING
Adresseavisen sat med det redaksjonelle ansvaret for Stud.mag. 2004. Prosjektleiar Anne Berit Bjørken meiner det er greitt å kalle det NM i utdanning.

– Eg meiner vi har god dekning for det. Dette er sjette året på rad vi gjennomfører undersøkinga, og til saman har 23.000 studentar delteke, poengterer Bjørken. Ho vedgår at dei kunne ha utdjupa betre at det kun er snakk om fyrsteårsstudentar.

– Det kan godt hende universiteta og høgskulane burde stått kvar for seg, seier Bjørken som likevel meiner det skal vere lett å skilje mellom universitet og høgskule. Det Hovdhaugen i NIFU kallar negativ vinkling, meiner Bjørken dei har journalistisk fridom til, med god dekning i tala frå TNS Gallup.

Studvest
følger saken:

Kvalitets-
reformen

Siste artikkel:
20. august 2003
Antall artikler: 36

Lånekassen

Siste artikkel:
11. september 2002
Antall artikler: 11