Banebrytande avtale om rekruttering
Den ekspansive teknologibedriften Grenland Group treng svært mange fleire kvalifiserte ingeniørar, og Høgskolen i Telemark ønskjer å rekruttere fleire studentar til sine ingeniørstudier. Nå samlar dei to partane kreftene sine.
Måndag underteikna Grenland Group, med administrerande direktør Hallgeir Skogen i spissen, og Høgskolen i Telemark gjennom Avdeling for teknologiske fag ei avtale om rekruttering.
Mål med avtala er både å styrke rekrutteringa til ingeniørstudia i høgskolen og å sikre rekruttering av kvalifisert personale til Grenland Group.
Det tredje hovudmålet er å profilere Grenland og Vestfold som eit attraktivt område for framtidige ingeniørar.
- Avtala er to-årig. Men vi håper det skal bli eit mykje lengre perspektiv på samarbeidet, seier Hallgeir Skogen.
Flaskehals
Grenland Group med hovudbase i Langesund har meir enn 900 tilsette. Konsernet har også store avdelingar i Sandefjord og Tønsberg utanom verksemder ein rad andre stader i landet og salskontor i Polen, Kina, Malaysia og USA.
Tilgangen på høgt kvalifisert teknologisk personale er nå ein flaskehals i den vidare utviklinga av selskapet.
- Vi treng 500 ingeniørar dei næraste fire - fem åra, seier Hallgeir Skogen.
Prosjektoppgåver
Etter avtala vil blant anna Grenland Group aktivt vere med på å vidareutvikle ingeniørstudia i høgskolen.
Ekskursjonar kvart år for HiT-studentar, temaer for prosjektoppgåver og hovduprosjektoppgåver, og økonomisk støtte til hovudprosjekt er blant bidraga frå Grenland Group etter den nye avtala. Også stipend til ingeniørstudentar som startar ved HiT kan bli aktuelt.
Høgskolen skal på si side hjelpe til å formidle sommarjobbar for sine studentar hos Grenland Group.
Overføring av kunnskap mellom tilsette i Grenland Group og ingeniørutdanningane i HiT er også del av avtala.
Prosjektbasert undervisning
Ingeniørutdanningane i Høgskolen i Telemark var for 20 år sidan først ute med prosjektbasert undervisning. Dette konseptet er utvikla vidare, og det passar også svært godt til det utvida samarbeidet med næringslivet.
- Den prosjektorienterte undervisninga har blitt eit varemerke for ingeniørstudia i HiT. Og gjennom samarbeidsavtala kan vi gjere ingeniørstudia våre enda meir etterspørselsorienterte, seier dekan Ole Ringdal ved Avdeling for teknologiske fag.