Bovdejupmi árvvoštallankonferánsii:

SÁMI DUTKANPROGRÁMMA: "LEA ÁVKI, MUHTO LEAGO DOARVÁI" SÁMI DUTKAN NORGGA DUTKANRÁĐIS

Dákko bokte bovde Norgga dutkanráđđi árvvoštallankonferánsii, mas sámi dutkanprográmma váldo ovdan. Konferánsa lágiduvvo Romssa universitehtas, Teorifágagárdimis, Auditorium 1, guovvamánu 23. ja 24. b., ja Sámi dutkamiid guovddáš Romssa universitehtas lea lágideaddji.

Vuosttaš beaivi lea biddjon iešárvvoštallamii. Prográmma bohtosat váldojuvvojit ovdan, ja konkrehta prošeavttat mat leat ožžon doarjaga prográmmas ovdanbuktojuvvojit. "Etnihkalaš gaskavuođat Davvi-Nordlánddas" dutkanprošeavtta dutkit ovdanbuktet sin govda prošeavtta mii čilge duogáža otná máŋggakultuvrralaš álbmogiidda dán guovllus, ja dat dahkko historjjálaš, antropologalaš ja arkeologalaš perspektiivvain (prošeavtta neahttasiiddut: http://www.arran.no/content/view/44/2/) Lullisámi studentastipendiáhtta ovdanbuktá iežas masterbarggu, mii lea čállon lullisámegillii. Guokte doavttergrádastipeandiáhta, arkeologiijas ja nammadutkamis, ovdanbuktiba iežaska dutkanprošeavttaid. "Smierru" - dokumentárafilbma meahccegeavaheami ja verddevuođa birra lea ovdamearkan dutkanbohtosiid gaskkusteamis (http://www.naturogkunnskap.info/135dokumentarfilm.htm)

Nuppi beaivvi besset sii geat geavahit progámma dutkanbohtosiid buktit ovdan sin oaiviliid. Konferánsa loahpahuvvo digaštallamiin sámi dutkanprográmma boahtteáiggi birra Norgga dutkanráđis.

Konferánsii mii bovdet buohkaid geat leat ožžon doarjaga prográmmas, sihke ásahusat ja ovttaskas olbmot. Konferánsa lea muđui rabas konferánsa.

Konferánsa dulkojuvvo sámegillii ja skandinavia gillii. Norgga dutkanráđđi ruhtada konferánssa. Dieđiheapmi dahkko interneahta bokte, geahča čuovvovaš siiddu:
http://www.sami.uit.no/evaluering/registrering.html

Dieđihanáigemearri lea: guovvamánu 13. b.

Dearvvuođaiguin