Romssa universitehta ávvudii Sámi álbmotbeaivvi, ja levgii sámi leavggain.

Kantiina Hálddahusdálus lei dievva go Romssa universitehta ávvudii Sámi álbmotbeaivvi 2004. Vieru mielde álggahuvvui ávvudeapmi Sámi soga lávlagiin.













Vaikko beaivi lea illu beaivi lei dán jagi maiddái moraš, go moadde beaivvi ovdal oaččuimet dieđu ahte Ann-Gøril Johansen lea jápmán. Son lei stipendiáhtta juridihkalaš fakultehtas, ja su dutkanbargu lea mávssolaš sámi riekte- ja vuoigatvuođadutkamis. Rektor Jarle Aarbakke álggahii minuhta jaskesvuođain muitit Ann-Gørila.

Iežas dearvvuođain bijai rektor deattu Romssa universitehta rolla eamiálbmotuniversitehtan. Sihke rektor ja Sámi dutkamiid guovddáža stivrajođiheaddji Bård A. Berg deattuheigga man mávssolaš ásahusaid ovttasbargu lea nannemis sámi ja eamiálbmot dutkamiid.

Mánát Báhpajávrri skuvllas lávlo ja juige.

Abdelaziz Berdahem, studeanta Marokkos eret, bijai riikkaidgaskasaš fokusa iežas sátnevuorus. Son lea gullevaš imazighen-álbmogii, eamiálbmot Davvi-Afriikkas mat maiddái gohčoduvvojit berbariin. Studeantan eamiálbmot-masteroahpus son deattuhii vejolašvuođaid maid dat lohkanfálaldat addá oahpasnuvvat eará eamiálbmogiid diliide.

Eamiálbmot-masteroahpu studeanttaid gaskkas leat maiddái sii geat bures hálddašit kultuvrralaš dáidagiid. Dan čájehii Silja Somby go juoiggai luđiid iešguđet guovllui Sámis. Erenoamáš čáppat lei luohti Guoládaga sámi guovllus, Ruoššas.